- પ્રથમ તબક્કાના મતદાનમાં 89 બેઠકો પર 780થી વધારે ઉમેદવારો ચૂંટણીમેદાને હશે
- બીજા તબક્કાના મતદાનમાં 800થી વધારે ઉમેદવારો ચૂંટણીમેદાને હશે
-
ચૂંટણીપંચે ગુજરાતમાં મતદાતાઓની અંતિમ યાદી બહાર પાડી હતી, તેમાં રાજ્યમાં કુલ ચાર કરોડ 90 લાખ 89 હજાર 765 મતદારો છે.
-
પુરુષ મતદાતાઓની સંખ્યા બે કરોડ 53 લાખ 36 હજાર 610 છે જ્યારે કે સ્ત્રી મતદાતાની સંખ્યા બે કરોડ 37 લાખ 51 હજાર 738 છે.
-
નવા મતદાતાઓની સંખ્યા 11.62 લાખ વધી છે. થર્ડ જેન્ડર મતદાતાની સંખ્યા પણ વધીને 1,417 થઈ છે. નોંધનીય છે કે માન્ય મતદારોમાં ચાર લાખથી વધુ વિકલાંગ મતદાતા છે.
-
સૌથી વધુ (59.9 લાખ) મતદારો અમદાવાદમાં છે, જ્યારે સૌથી ઓછા (1.93 લાખ) મતદારો ડાંગમાં છે.
પહેલી ડિસેમ્બરે મતદાનના દિવસે વટાઉ ખત અધિનિયમ હેઠળ રજા જાહેર કરવામાં આવી છે.
પહેલા તબક્કાની તમામ 89 બેઠક ઉપર ભાજપ અને કોંગ્રેસે પોતાના ઉમેદવાર ઊભા રાખ્યા છે, જ્યારે આમ આદમી પાર્ટીએ 88 ઉમેદવાર ઊભા રાખ્યા છે. બહુજન સમાજ પાર્ટી 57 ઉમેદવાર સાથે ચોથા ક્રમે છે, તો ભારતીય ટ્રાયબલ પાર્ટી 14 ઉમેદવાર સાથે પાંચમા ક્રમે અને સમાજવાદી પાર્ટીએ બાર ઉમેદવાર ઊભા રાખ્યા છે.
પહેલા તબક્કાની કુલ 89 બેઠક પૈકી ભાજપે નવ તો કોંગ્રેસે 6 મહિલાને ટિકિટ આપી છે, તો આપમાંથી પણ પાંચ મહિલા ચૂંટણીના મેદાનમાં ઉતરી છે. 339 અપક્ષ પૈકી 35 મહિલા ઉમેદવાર ચૂંટણી ના મેદાનમાં છે.
પહેલી ડિસેમ્બરે 788 ઉમેદવારોનું ભાવી ઈવીએમમાં કેદ કરવાનો મતાધિકાર બે કરોડ 39 લાખથી વધુ મતદારો ના હાથ માં છે, જેમાં એક કરોડ 15 લાખ થી વધુ મહિલા મતદાર નો સમાવેશ થાય છે. ત્રીજી જાતિ ના 497 મતદાર પણ નોંધાયેલા છે, તો સેવા મતદાર ની સંખ્યા નવ હજાર જેટલી છે.
પ્રથમ તબક્કામાં જ્યાં મતદાન યોજાનાર છે, તે 19 જિલ્લાઓમાં અત્યાર સુધીમાં એક કરોડ 80 લાખથી વધુ વોટર ઈન્ફોર્મેશન સ્લીપનું વિતરણ થઈ ગયું છે.
પ્રથમ તબક્કા હેઠળની મોરબી બેઠકમાં 17 ઉમેદવારો હોવાથી 2 બેલેટ યુનિટ, જ્યારે સુરતના લિંબાયત મતવિસ્તારમાં 44 ઉમેદવાર હોવાથી 03 બેલેટ યુનિટ વપરાશે.
પહેલા તબક્કાનું મતદાન સફળતાપૂર્વક યોજવા માટે 34 હજારથી વધુ બેલેટ યુનિટ અને કંટ્રોલ યુનિટ તથા 38 હજારથી વધુ વીવીપેટ ફાળવામાં આવ્યા છે, તો ચૂંટણી ફરજ ઉપર 27 હજારથી વધુ પ્રિસાઈડીંગ ઑફિસર્સ અને 78 હજારથી વધુ પોલીંગ ઑફિસર્સ મૂકવામાં આવ્યા છે.
આ મતદાન તબક્કા માટે વિશિષ્ટ મતદાન મથક ઊભા કરવામાં આવ્યા છે, જેમાં સખી મતદાન કેન્દ્રની સંખ્યા 611 છે, જ્યારે 89 જેટલા ઈકો ફ્રેન્ડલી મતદાન કેન્દ્ર પણ ખોલાયા છે.
મતદાન કરવા માટે માત્ર મતદાર ફોટો
ઓળખકાર્ડ(EPIC) પૂરતું નથી. મતદાર યાદીમાં મતદારનું નામ હોવું જરૂરી છે. એટલું જ નહિં, ગુજરાત વિધાનસભાની આ ચૂંટણીમાં મતદાન માટે મતદારની ઓળખ પ્રસ્થાપિત કરવા માત્ર વોટર ઈન્ફર્મેશન સ્લીપ ઉપયોગમાં લઈ શકાશે નહિં.
મતદાર ફોટો ઓળખપત્ર(એપીક કાર્ડ)ની અવેજીમાં આધાર કાર્ડ, મનરેગાના જોબ કાર્ડ, બેન્ક કે પોસ્ટ ઓફિસની ફોટોગ્રાફ્સ સાથેની પાસબુક, હેલ્થ ઈન્સ્યોરન્સ સ્માર્ટ કાર્ડ, ડ્રાઈવીંગ લાયસન્સ, પાનકાર્ડ, ભારતીય પાસપોર્ટ, ફોટોગ્રાફ સાથેના પેન્શનના દસ્તાવેજ, કેન્દ્ર/રાજ્ય સરકાર/જાહેર ક્ષેત્ર/ જાહેર લિમીટેડ કંપનીઓએ કર્મચારીઓને ઈસ્યુ કરેલા ફોટોગ્રાફ સાથેના સર્વિસ ઓળખપત્રો, સંસદસભ્યો/ધારાસભ્યો/વિધાન પરિષદના સભ્યોને ઈસ્યુ કરેલાં સરકારી ઓળખપત્રો, યુનિક ડિસએબિલીટી આઈ-કાર્ડ તથા બિન નિવાસી ભારતીયોઓની જો મતદાર તરીકે નોંધણી થઈ હોય તો, તેઓ મતદાન મથકે અસલ પાસપોર્ટ રજૂ કરીને પોતાની ઓળખ પ્રસ્થાપિત કરી મતદાન કરી શકશે. પાંચમી ડિસેમ્બરે યોજાનાર બીજા તબક્કા ના મતદાન હેઠળ ની 93 બેઠક માટે રાજકીય પ્રચાર પુરજોશ માં ચાલી રહ્યો છે .
AD….
