-
સુરેન્દ્રનગરના પાણશીણા પાસે એસએમસીનો દરોડો
-
હરિયાણાથી દારૂનો જથ્થો આવતો હતો, જયપુરના બે ભાઈઓએ દારૂનો જથ્થો મોકલાવ્યાનું ખૂલ્યું
રાજકોટ: રાજકોટના બૂટલેગરે મંગાવેલો ૭૧.૬૬ લાખનો અંગ્રેજી દારૂ એસએમસીએ પાણશીણા પાસેથી કબ્જે કર્યો છે. જો કે રાજકોટના ક્યા બૂટલેગરે દારૂનો આટલો જંગી જથ્થો મંગાવ્યો તે વિશે હજુ સુધી એસએમસીને કોઇ માહિતી મળી નથી. હરિયાણાથી આ દારૂનો જથ્થો આવતો હતો.
એસએમસીના ડીવાયએસપી કે.ટી. કામરિયાને મળેલી માહિતીના આધારે પીએસઆઈ ડી.વી. ચિત્રાએ સ્ટાફના માણસો સાથે પાણશીણા પાસે વોચ ગોઠવી ત્યાંથી પસાર થયેલા કન્ટેનર અને ટ્રેલરને અટકાવી તલાશી લેતાં કન્ટેનરના ચોરખાનામાંથી અંગ્રેજી દારૂની ૩૩૬ જ્યારે ૧૬ વ્હીલના ટ્રેલરમાંથી અંગ્રેજી દારૂની ૧૨૬૭ મળી કુલ ૧૬૦૩ પેટી મળી આવી હતી.
તે સાથે જ એમએમસીએ બંને વાહનોના ચાલકો પ્રકાશ કેશવનાથ જોગી અને ખેતારામ વાકારામ જાટ (રહે. બંને બાડમેર, રાજસ્થાન)ને ઝડપી લીધા હતા. બંને વાહનો, રૂા. ૭૧.૭૬ લાખનો દારૂ, બે મોબાઇલ ફોન, બે જીપીએસ ટ્રેકર વગેરે મળી કુલ રૂા. ૧.૧૧ કરોડનો મુદ્દામાલ કબ્જે કર્યો હતો.
પૂછપરછમાં બંને ડ્રાઇવરોએ એવી કબૂલાત આપી હતી કે દારૂનો આ જથ્થો હરિયાણાથી ભરી રવાના થયા હતા. વાયા જયપુર, ઉદેપુર, અમદાવાદ થઇ રાજકોટ પહોંચ્યા હતા. રાજકોટ પહોંચે ત્યારે જે શખ્સ ફોન કરે તેને દારૂના વાહનો આપી દેવાની સૂચના મળી હતી. જેના પરથી એસએમસીએ રાજકોટના બૂટલેગરે આ દારૂનો જથ્થો મંગાવ્યાનું તારણ કાઢ્યું છે.
દારૂનો જથ્થો મોકલનાર તરીકે રાજસ્થાનના જયપુરના કોટપૂતલી ગામના સતપાલસિંહ યાદવ અને તેના ભાઇના નામ ખૂલ્યાં છે. એસએમસીના સૂત્રોએ જણાવ્યું કે આ બંને આરોપીઓ પકડાયા બાદ રાજકોટના ક્યા બૂટલેગરે દારૂનો આ જથ્થો મંગાવ્યો હતો તેનો ખુલાસો થશે. હાલ આ બંને આરોપીઓ સાથે એક મોબાઇલ ધારક ઉપરાંત રાજકોટમાં દારૂનો જથ્થો મંગાવનાર અજાણ્યા બૂટલેગરને એમએસસીએ વોન્ટેડ દર્શાવી તપાસ આગળ ધપાવી છે.
Ad..
