આમ આદમી પાર્ટીના રાષ્ટ્રીય કન્વીનર અને દિલ્હીના મુખ્યમંત્રી અરવિંદ કેજરીવાલ જી તેમના 2 દિવસીય ગુજરાત પ્રવાસ

0
232

અમદાવાદ/જામનગર/ગુજરાત

આમ આદમી પાર્ટીના રાષ્ટ્રીય કન્વીનર અને દિલ્હીના મુખ્યમંત્રી અરવિંદ કેજરીવાલ જી તેમના 2 દિવસીય ગુજરાત પ્રવાસ માટે આજે જામનગર એરપોર્ટ પર આવી પહોંચ્યા હતા. ત્યાં આમ આદમી પાર્ટી ના ગુજરાત પ્રદેશ ચૂંટણી પ્રભારી ગુલાબસિંહ યાદવ, આમ આદમી પાર્ટી નેશનલ જોઈંટ જનરલ સેક્રેટરી ઇસુદાન ગઢવી, નેશનલ જોઈંટ સેક્રેટરી ઈન્દ્રનીલ રાજગુરુ, આમ આદમી પાર્ટી ના ગુજરાત પ્રદેશ પ્રમુખ ગોપાલ ઈટાલિયા અને વિદ્યાર્થી નેતા યુવરાજસિંહ જાડેજા સહિત પાર્ટી ના ઘણા નેતાઓ અને કાર્યકરોએ અરવિંદ કેજરીવાલ જી નું ઉષ્માભર્યું સ્વાગત કર્યું.

જામનગર એરપોર્ટ પર મીડિયાને સંબોધતા અરવિંદ કેજરીવાલે કહ્યું કે, આજે અમે જામનગરમાં વેપારીઓ ને મળીશું, વેપારીઓ ની સમસ્યાઓ સાંભળીશું અને વેપારીઓ માટે મહત્વની ગેરંટી જાહેર કરીશું. આ પછી આવતીકાલે અમે આદિવાસી સમાજના લોકોને મળીશું અને જો આમ આદમી પાર્ટીની સરકાર બનશે તો આદિવાસી સમાજ માટે અમારી શું યોજના હશે, અમે તેમના માટે શું કરીશું તેની ગેરેંટી જાહેર કરીશું. ગુજરાતમાં આમ આદમી પાર્ટી ને જબરદસ્ત જન સમર્થન મળી રહ્યું છે અને આનાથી ભાજપ ખરાબ રીતે નારાજ છે. છેલ્લા 27 વર્ષથી અહીં ભાજપનું શાસન છે અને તેના કારણે તેમનામાં ઘમંડ આવી ગયો છે. ભાજપને જનતા સાથે કોઈ લેવાદેવા નથી.

  • લઠ્ઠાકાંડ જેવી ઘટના બનવા છતાં મુખ્યમંત્રી અને સી.આર. પાટીલ તેમને મળવા ગયા ન હતા. આ દર્શાવે છે કે તેમનામાં કેટલો વધારે ઘમંડ છેઃ અરવિંદ કેજરીવાલ

થોડા દિવસો પહેલા ગુજરાતમાં લઠ્ઠાકાંડ ની ઘટના બની હતી, જેમાં ઘણા લોકોના મોત થયા હતા અને ઘણા લોકોની હાલત અત્યંત નાજુક હતી. તે વખતે હું દિલ્હીનો મુખ્યમંત્રી હોવા છતાં તે પીડિતોને મળવા ગયો પરંતુ ગુજરાતના મુખ્યમંત્રી અને સી.આર. પાટીલ તે પીડિતોને મળવા ગયા ન હતા. આ બધું સાંભળીને અમને ખૂબ દુઃખ થયું કારણ કે રાજ્યમાં આટલી મોટી ઘટના બની હોવા છતાં મુખ્યમંત્રી અને સી.આર. પાટીલ તેમને મળવા ગયા ન હતા. તે દર્શાવે છે કે તેમના માં ઘણો અહંકાર છે. પણ હવે ગુજરાતની જનતા આ બધું બદલવા માંગે છે. ગુજરાતમાં ભાજપ અને કોંગ્રેસ વચ્ચે ઇલુ ઇલુ ચાલી રહ્યું છે. પરંતુ હવે ગુજરાતની જનતા પાસે આમ આદમી પાર્ટીના રૂપમાં એક વિકલ્પ છે.

  • હવે પંજાબમાં પણ મફત વીજળીના કારણે છેલ્લા એક અઠવાડિયામાં લગભગ 25 લાખ લોકોના વીજ બિલ શૂન્ય આવ્યા છે: અરવિંદ કેજરીવાલ

ગુજરાતના મુખ્યમંત્રીએ હવે ઘરની બહાર કામ કરવું પડશે કારણ કે તેમનું કામ ઘરમાં બેસીને ચાલશે નહીં. કારણ કે અત્યાર સુધી તેઓ એમ જ માનતા હતા કે કોંગ્રેસ તેમની પોતાની પાર્ટી છે, પોતાની બહેન છે, તો તેમનું કામ ઘરે બેઠા આરામથી ચાલશે, પરંતુ હવે ગુજરાતના રાજકારણમાં આમ આદમી પાર્ટી આવી ગઈ છે અને લોકો આમ આદમી પાર્ટી તરફ ઘણી આશા થી જોઈ રહ્યા છે. લોકોએ જોયું કે દિલ્હીમાં આમ આદમી પાર્ટીની સરકારે કેવું અદ્ભુત કામ કર્યું. હવે પંજાબમાં પણ વીજળી ફ્રી થઈ ગઈ છે. છેલ્લા 1 અઠવાડિયામાં લગભગ 25 લાખ લોકોના વીજ બિલ શૂન્ય પર આવી ગયા છે. ગુજરાતમાં પણ આવું બની શકે છે, ગુજરાતની જનતાને ઝીરો વીજ બિલ પણ આવી શકે છે. આ માટે રાજનીતિ બદલવી પડશે. જો લોકો આમ આદમી પાર્ટી ને મત આપે તો ગુજરાતમાં પણ લોકોને ઝીરો વીજ બિલ મળી શકે છે.

આમ આદમી પાર્ટીના રાષ્ટ્રીય કન્વીનર અને દિલ્હીના મુખ્યમંત્રી અરવિંદ કેજરીવાલ જી એ ભારત માતા ની જયકાર સાથે જામનગર માં વેપારીઓ ને સંબોધતા કહ્યું કે, મને વાત મળી છે કે ઘણા વેપારીઓ ને આ સભામાં ના આવવા માટે ડરાવવા ધમકાવવા માં આવ્યા હતા, છતાં તે લોકો મને મળવા આવ્યા તે બદલ હું દરેકનો આભારી છું. ભારત દેશને આઝાદ થયે 75 વર્ષ વીતી ગયા છે, અને આજે દેશમાં ચારે બાજુ આઝાદી ને લઈને ખુશી નો માહોલ છે પરંતુ આ વખત વિચારવાનો પણ છે, કે 75 વર્ષ માં આપણે ઘણું બધું પામ્યું છે પણ આ 75 વર્ષ માં ઘણાં એવા દેશ છે જે આપણા થી આગળ નીકળી ગયા છે. સિંગાપુર સિક્સ્ટી ના દશકમાં આઝાદ થયો હતો, અને જાપાન તથા જર્મની બીજા વિશ્વયુદ્ધ માં બરબાદ માં થઇ ગયા હતા, અને આવા ઘણા દેશ છે જે 75 વર્ષ માં આપણા થી આગળ નીકળી ગયા છે. પણ આપણે કેમ પાછળ રહી ગયા? ભગવાને જ્યારે દુનિયા બનાવી ત્યારે સૌથી સુંદર જગ્યા ભારત ને બનાવી, વૃક્ષ, પહાડ, નદીઓ, ખનીજ એમ ભગવાને આપણને બધું જ આપ્યું છે. જ્યારે ભગવાને માણસ બનાવ્યા ત્યારે સૌથી બુદ્ધિશાળી માણસો પણ ભારતને જ આપ્યા, આજે મોટી મોટી કંપનીના સીઈઓ પણ ભારતના જ લોકો હોય છે. એમ ભગવાને ભારત ને બધું જ આપ્યું છે. તો પણ આપણે પાછળ કેમ?

  • ગુજરાતના લોકો વિશ્વમાં જ્યાં પણ જાય છે, તેઓ હંમેશા અન્ય દેશોમાં ભારતનું ગૌરવ વધારે છે: અરવિંદ કેજરીવાલ

ગુજરાત ના લોકો વિશ્વ માં ગમે ત્યાં જાય, બીજા દેશોમાં હંમેશા ભારત નું નામ રોશન કરે છે. ગુજરાત ના લોકો મહેનતુ છે, બુદ્ધિશાળી છે. પરંતુ જ્યારે તે ગુજરાતમાં હોય તો તેમને કહેવામાં આવે છે કે કેજરીવાલ ની સભા માં ના જતા. એટલે આપણો દેશ હજી સુધી પાછળ રહી ગયો છે. આપણે આપણા માં જ લડતા રહી ગયા, આપણે ગંદી રાજનીતિ નો ભાગ બનીને રહી ગયા. જો આવા જ લોકોને ભરોસે દેશ છોડી દીધો તો હજી આપણે 75 વર્ષ પાછળ રહી જઈશું. દેશના લોકોને ઊભું થવાની જરૂર છે, 130 કરોડ લોકોને સાથે અવની જરૂર છે. દેશને લોકો આગળ લઈને જશે કોઈ નેતા કે કોઈ પાર્ટી નહિ. આપણા પાસે શ્રેષ્ઠ ડોક્ટર છે, શ્રેષ્ઠ એન્જિનિયર છે, શ્રેષ્ઠ ખેડૂતો છે, શ્રેષ્ઠ વકીલ છે, દરેક વ્યવસાય માં શ્રેષ્ઠ લોકો છે, છતાંય આપણો દેશ પાછળ છે કેમ કે આપણા દેશ ની રાજનીતિ ખુબ ખરાબ છે, તેને ઠીક કરવી પડશે.

  • પરિવર્તન શક્ય હતું, પરંતુ ભાજપ કોંગ્રેસે આપણને 70 વર્ષ અંધારામાં રાખ્યા, 70 વર્ષ સુધી દગો કર્યોઃ અરવિંદ કેજરીવાલ

હું પણ સામાન્ય માણસ જ હતો મેં ક્યારેય ન હતુ વિચાર્યું કે હું ક્યારેય રાજનીતિ માં આવીશ. એ તો પછી કિસ્મત પલટાઈ ગઈ, દિલ્હી ના લોકો એ એટલો પ્રેમ આપ્યો અને પછી હું દિલ્હી નો મુખ્યમંત્રી બન્યો. પહેલા હું ઈનકમ ટેક્સ કમિશનર રૂપે કામ કરતો હતો, કમિશનર નું કામ છોડીને મેં દિલ્હી ની ઝૂંપડપટ્ટીઓ માં કામ કરવાનું શરૂ કરેલું, ત્યાં મેં દેખ્યું કે ગરીબ લોકો ના બાળકો સરકારી શાળામાં અભ્યાસ કરતા હતા પરંતુ સરકારી શાળા ની હાલત ખુબ જ ખરાબ હતી, સરકારી દવાખાને ઈલાજ કરાવવા જઈએ તો ત્યાં ની હાલત ખુબ ખરાબ, ત્યારે મને લાગ્યું કે 70 વર્ષ થઇ ગયા છે દેશને આઝાદ થયે, સરકારો બિચારી કોશિશ તો કરી રહી હશે પણ તે કરી નહિ શકતા હોય. પણ પછી દિલ્હીમાં આમ આદમી પાર્ટી ની સરકાર બની અને અમે એ જ કામ 5 વર્ષ માં કરી બતાવ્યા. અમે 5 વર્ષ માં જ શાનદાર સ્કૂલ અને હોસ્પિટલો બનાવી દીધી, હવે દિલ્હી માં લોકો મોટી હોસ્પિટલો છોડીને સરકારી હોસ્પિટલોમાં ઈલાજ કરવા જાય છે. ત્યારે મને ખબર પડી કે આ બધું થઈ તો શકતું હતું, 70 વર્ષ માં સ્કૂલો, હોસ્પિટલો, વ્યવસાયો, વીજળી, પાણી, રોડ રસ્તાઓ, ઉદ્યોગો બધું જ સારું થઇ શકતું હતું પરંતુ એ લોકો એ 70 વર્ષ સુધી અંધારામાં રાખ્યા આપણને, 70 વર્ષ સુધી છેતરપિંડી કરી.

  • હું ગુજરાતના મુખ્યમંત્રી ને આમંત્રણ આપું છું કે તેઓ પણ દિલ્હી આવે અને લોકો સાથે સંવાદ કરે: અરવિંદ કેજરીવાલ

હું દિલ્હી થી અહીંયા તમને મળવા આવું છું, તો એમાં ખોટું શું છે? હું કોઈ આતંકવાદી થોડી છું. મેં ક્યાં કઈ વધારે માંગ્યું છે, અહીંયા આવું છું તમારી સમસ્યાઓ જાણું છું બસ, મારી તો વિનંતી છે સી.આર. પાટીલ જી થી કે તમે પણ આવો આ સભામાં, આપણે સમસ્યાઓ વિષે ચર્ચા કરીયે આ તો ગુજરાત ની સંસ્કૃતિ છે. એમાં GST ના અધિકારીઓને ધમકાવવાની શું જરૂર છે કે કેજરીવાલ ની સભા માં જશો તો ખોટું થશે. અને આજે અહીંયા થી હું ગુજરાતના મુખ્યમંત્રી ને આમંત્રિત કરું છું કે, તમે પણ દિલ્હી આવો અને સભા કરો હું બધાને કહીશ કે તમારી સભામાં હાજરી આપે. શું ખબર ગુજરાતના મુખ્યમંત્રી કંઈક સારી વાત કહી દે, મને સમજાતું નથી કે ગુજરાત માં સારી વાતોના આદાન પ્રદાન પર કેમ રોક લગાવવામાં આવી રહી છે? આના પહેલા સુરત માં પણ એક જનસભામાં આમંત્રણ મળ્યું હતું, ત્યાં પણ ધમકીઓ આપીને હોલ ની બુકિંગ સુધી રદ કરી દેવામાં આવી હતી, રાજકોટ માં પણ આવી રીતે વેપારીઓ સાથે સભા હતી પણ પછી વાત મળી કે મારી સભા પછી બધા વેપારીઓ ને ખુબ જ હેરાન કરવામાં આવ્યા હતા. અને આજે પણ અહીંયા આવવાના પહેલા જ લોકો ને ધમકીઓ મળવા લાગી કે ખબરદાર જો કેજરીવાલ ની સભા માં ગયા તો. આ યોગ્ય નથી, આ ગુજરાત ની સંસ્કૃતિ નથી. હું ભાજપના લોકો ને હાથ જોડીને વિનંતી કરવા માંગુ છું કે આ યોગ્ય નથી, આવું ન કરવું જોઈએ.

  • જો આમ આદમી પાર્ટી સરકાર બનાવે છે, તો વેપારીઓ અને સરકાર ભાગીદાર બનીને રહેશે, તમે માત્ર આદેશ આપો, અને સરકાર તમારા આદેશનો અમલ કરશે: અરવિંદ કેજરીવાલ

સામાન્ય રીતે એવું જ હોય છે કે, ચૂંટણી વખતે જ પાર્ટીઓને વેપારીઓ અને ઉદ્યોગપતિઓ યાદ આવે છે કેમ કે તેમણે ડોનેશન લેવાનું હોય છે. પણ હું તમારી પાસે ડોનેશન લેવા નથી આવ્યો, મને ડોનેશન નથી જોઈતું, હું આજે તમને સૌને, ગુજરાતના વેપારીઓ ને, ગુજરાતના ઉદ્યોગપતિઓ ને, ગુજરાતના વિકાસમાં ભાગીદાર બનાવવા આવ્યો છું. આમ આદમી પાર્ટીની સરકાર બનશે તો તમને પાર્ટનર ની જેમ રાખવામાં આવશે, તમે ફક્ત હુકમ કરજો, અને સરકાર તમારા હુકમ ને લાગુ કરશે. કેમ કે, તમને ખબર છે કે સમસ્યા શું છે. સરકાર માં બેઠેલા મંત્રીઓ ને થોડી ખબર છે કે સમસ્યા શું છે. અને એટલા વિભિન્ન પ્રકારના ઉદ્યોગ અને વેપાર હોય છે તેની બધી જાણ સરકાર પાસે ના હોય એટલે તમે જ નિર્ણય લેશો અને સરકાર તેને લાગુ કરશે.

  • અમે દિલ્હીમાં રેડ રાજ ખતમ કર્યું: અરવિંદ કેજરીવાલ

જ્યારે દિલ્હીમાં આમ આદમી પાર્ટી ની નવી નવી સરકાર બની હતી ત્યારે કહેવામાં આવતું હતું કે, દિલ્હી ના વેપારીઓ ભાજપની વોટ બેંક છે. આજે સરકાર ચલાવતા ચલાવતા 7 વર્ષ થઇ ગયા છે. છતાંય આજ સુધી કોઈ પણ ભાજપ ના સમર્થક વેપારી કે બીજા અન્ય વેપારીઓ ના ઘરે રેડ પડવા નથી દીધી, રેડ રાજ જ ખતમ કરી દીધું છે. અને કોઈ પણ ભાજપ ના વેપારી ને અમે હેરાન નથી કર્યા, તમે દિલ્હીના વેપારીઓ ને ફોન કરીને પૂછી શકો છો, અમે અમારા આચરણ થી અને નીતિઓ થી વેપારીઓનું દિલ જીત્યું છે. અને જો કોઈ દિલ્હી નું વેપારી એમ કહે કે કેજરીવાલ ખરાબ માણસ છે તો મને વોટ ન આપતા. મેં દિલ્હી ની જનતા ને કહ્યું હતું કે, જો હું 5 વર્ષ સારું કામ ન કરું તો મને બીજી વખત વોટ ના આપતા, અને મને નથી લાગતું કે કોઈ બીજા નેતા માં એટલી હિંમત છે જે જનતા ની વચ્ચે જઈને કહી શકે કે હું કામ ના કરું તો મને વોટ ના આપતા.

  • જો અહીં ખુલ્લેઆમ દારૂ વેચાય છે, તો સરકારને ખબર જ હશે, તેનો અર્થ એ છે કે આ બધું સરકારની મરજી થી, પ્રશાસનની ભાગીદારી થી થઈ રહ્યું છે: અરવિંદ કેજરીવાલ

હું તમને પૂછવા માગું છું કે, ગુજરાત માં 27 વર્ષથી ભાજપનું શાસન છે શું આજ સુધી ક્યારેય એમને મારી જેમ તમારી સમસ્યાઓ સાથે આમ તમારા વિચારોનું આદાન પ્રદાન કર્યું છે? મને લાગે છે કે તેઓ દર વખતે ફક્ત આવીને ભાષણ જ આપીને જતા રહેતા હશે. આ લોકતંત્ર છે અહીંયા લોકોના વિચારો જાણવા, તેમની સમસ્યાઓ જાણવી ખુબ જ જરૂરી છે. હમણાં જ ગુજરાત માં લઠ્ઠાકાંડ ની ઘટના ઘટી, કહેવાય છે કે ગુજરાત માં દારૂબંધી છે પણ અહીંયા તો ખુલ્લેઆમ દારૂ વેચાય છે, માંગો તો ઘર સુધી દારૂ આપીને જાય છે, આ હજારો કરોડો નો ધંધો છે, પરંતુ આ બધું કોણ ચલાવી રહ્યું છે? આનું માસ્ટર માઈન્ડ કોણ છે? જ્યારે હું ભાવનગરમાં લઠ્ઠાકાંડ ના પીડિતો ને મળવા ગયો, ત્યાં તે લોકો સાથે વાતચીત કરી તો ખબર પડી કે દારૂ તો ખુલ્લેઆમ વેચાય છે. જો આ ખુલ્લેઆમ વેચાતું હોય તો સરકાર ને તો ખબર જ હશે, મતલબ આ બધું સરકાર ની મરજી થી થઇ રહ્યું છે, પ્રશાસન ની ભાગીદારી થી ચાલી રહ્યું છે. હું લઠ્ઠાકાંડ ના પીડિતો ને મળવા ગયો, દિલ્હી નો મુખ્યમંત્રી પરંતુ ગુજરાતના મુખ્યમંત્રી તેમણે મળવા ના ગયા, સી.આર. પાટીલ તેમણે મળવા ના ગયા. દરેક વસ્તુ તો વોટ ના ત્રાજવા માં ના તોલવી જોઈએ ને? માણસાઈ જેવું પણ કંઈ હોય ને? આપણા જ રાજ્યના લોકો છે, આપણા જ દેશના લોકો છે, મળવા જવામાં શું વાંધો છે?

ગુજરાત સરકાર પર 3.5 લાખ કરોડનું દેવું છે, પરંતુ દિલ્હી સરકાર પર કોઈ દેવું નથી: અરવિંદ કેજરીવાલ

આજકાલ રેવડી ની ખૂબ ચર્ચા થઈ રહી છે દેશ માં, ફ્રી ની રેવડી, ફ્રી ની રેવડી. આજ દિલ્હીમાં સરકારી શાળા એટલી શાનદાર બનાવમાં આવી છે કે, દિલ્હી ની સરકારી શાળા ના 400 થી વધારે વિદ્યાર્થીઓ એ IIT ની પરીક્ષા પાસ કરી છે, 400 થી વધારે વિદ્યાર્થીઓ એ NEET ની પરીક્ષા પાસ કરી છે, વિદ્યાર્થીઓ ખુબ સારી અંગ્રેજી બોલવા લાગ્યા છે, 99% થી વધારે નું પરિણામ આવ્યું છે દિલ્હી ની સરકારી શાળાઓ નું. જો હું સરકારી શાળાઓ માં ફ્રી માં શિક્ષણ આપી રહ્યો છું, તો શું હું એ ખોટું કરી રહ્યો છું? તે રાષ્ટ્ર નિર્માણ નું કામ છે. પહેલા દિલ્હી ની શાળાઓ ની હાલત ખરાબ જ હતી, અમે તેની હાલત સુધારી ને શિક્ષણ મફત કરી દીધું. દિલ્હીમાં 2 કરોડ લોકો રહે છે, દરેક નો ઈલાજ મફત કરી દીધો સરકારી હોસ્પિટલો માં, તો શું ખોટું કર્યું મેં? અને લોકો કહે છે કે ફ્રી ની રેવડી વેચે છે કેજરીવાલ. પણ જો સુવિધાઓ મફત માં ના આપી શકે સરકાર તો જનતા એ ટેક્સ ભરવાનો ફાયદો શું? પંજાબ માં 300 યુનિટ અને દિલ્હીમાં 200 યુનિટ મફત વીજળી મળે છે, તેઓ કહે છે કે સરકાર ખોટ માં જતી રહેશે. પરંતુ એક ક્વાર્ટર માં 1 એપ્રિલ થી 30 જૂન સુધી પહેલા પંજાબ માં 15000 કરોડ નું રેવન્યુ આવતું હતું અને હવે આમ આદમી પાર્ટી ની સરકાર બનતા જ 21000 કરોડ નું રેવન્યુ આવ્યું છે. મફત વીજળી આપવાનો ખર્ચો નીકળી ગયો અમારો, ઈમાનદાર લોકો છીએ, જયારે સરકાર ઈમાનદારી થી ચાલે તો જનતા પણ ટેક્સ ભરે છે. CAG ની રિપોર્ટ માં લખેલું છે કે, આખા દેશ માં ફક્ત દિલ્હી નું બજેટ છે જે ખોટ માં નહિ પણ નફામાં ચાલી રહ્યું છે. અને ગુજરાત સરકાર પર સાડા ત્રણ લાખ કરોડનું દેવું છે, પણ દિલ્હી સરકાર પર કોઈ પણ પ્રકાર નું દેવું નથી. આ લોકો એ એમના મિત્રો ના 11 લાખ કરોડ રૂપિયા માફ કરી દીધા, હું તમને પૂછવા માગું છું કે તે યોગ્ય છે કે મફત માં સારું શિક્ષણ આપવું યોગ્ય છે?

  • જો કોઈના પૈસા ફસાઈ જાય તો ચિંતા કરવાની જરૂર નથી, તેના માટે સારો કાયદો બનાવશું: અરવિંદ કેજરીવાલ

આટલા વર્ષો સુધી અંગ્રેજો નું જ સિસ્ટમ ચાલતું આવી રહ્યું છે, આપણે સિસ્ટમ બદલી જ નથી, કે ના ભાષા બદલી છે, શિક્ષણ વ્યવસ્થા જે મેકલમ એ લાગુ કરી હતી તે જ વર્ષોથી ચાલી આવી રહી છે. આજ સુધી ડિગ્રી લીધા પછી પણ લોકો નોકરી જ શોધી રહ્યા છે. પણ હવે અમે દિલ્હી માં શિક્ષણ વ્યવસ્થા બદલી રહ્યા છે. ઘણા લોકો ને હિન્દી માં બોલતા શરમ આવે છે, પણ મેં નક્કી કર્યું છે કે હું જ્યાં પણ જઈશ ત્યાં હિન્દી માં જ બોલીશ. કેમ કે મને હિન્દી પર ગર્વ છે. હું જાણું છું કે, કોઈના પૈસા ફસાઈ જાય તો કેટલી તકલીફો નો સામનો કરવો પડે છે. જો આમ આદમી પાર્ટી ની સરકાર બની તો, અમે તેના પર જરૂર કોઈ સારો કાયદો બનાવીશું. એટલે આજે હું વેપારીઓ ને ગેરેંટી આપવા માંગુ છું. ગેરેંટી ની નવી પ્રથા અમે દેશ માં ચાલુ કરી છે, મતલબ જેમ ફેવિકોલ નો જોડ ક્યારેય તૂટે ના એમ જ કેજરીવાલ ની ગેરેંટી ક્યારેય ખોટી ના પડે.

અરવિંદ કેજરીવાલ જી એ ગુજરાતના વ્યાપારીઓને 5 વાતો, 5 વાયદા અને 5 ગેરેન્ટી આપી.

1) ડર નો માહોલ સંપૂર્ણ રીતે ખતમ કરી દઈશું, નીડરતા અને શાંતિ સાથે વ્યાપાર કરવાનું વાતાવરણ બનાવશું.
2) દરેક વ્યાપારી ને તે ઈજજત આપશું જેના એ હકદાર છે.
3)રેડ રાજ બંધ કરશું, ભ્રષ્ટાચાર થી મુક્તિ આપીશું, જે ફક્ત આખા દેશ માં કટ્ટર ઈમાનદાર આમ આદમી પાર્ટી જ આપી શકે છે.
4) VAT ના અને બીજા જેટલા પણ રિફંડ પેન્ડિંગ પડ્યા છે, તે બધા 6 મહિના માં ચુકતા કરી દઈશું અને GST ને સરળ બનાવશું.
5) એક એવી વ્યવસ્થા લાગુ કરવામાં આવશે, જેમાં વ્યાપારીઓને પાર્ટનરશીપ આપવામાં આવશે, દરેક સેક્ટર થી એક પ્રતિનિધિ ઉભો કરવામાં આવશે જે વ્યાપારીઓની દરેક સમસ્યા અને સુજાવ સરકાર સામે રજૂ કરશે અને સરકાર તરફથી તે પ્રમાણે વ્યવસ્થા લાગુ કરવામાં આવશે.

  • દિલ્હીમાં કોઈને ધક્કા ખાવાની જરૂર નથી, ઘરે ઘરે સરકારી સુવિધાઓ ઉપલબ્ધ છેઃ અરવિંદ કેજરીવાલ

જ્યારે શરૂઆતમાં દિલ્હીમાં આમ આદમી પાર્ટી ની સરકાર બની હતી ત્યારે દિલ્હી નું સંપૂર્ણ રેવન્યુ 30000 કરોડ હતું, અને આજે 7 વર્ષ પછી દિલ્હી નું રેવન્યુ 75000 કરોડ છે. દિલ્હી માં એક નંબર પણ જાહેર કરવામાં આવ્યો છે, 1076. જેમાં ફોન લગાવવાથી તમે કોઈ પણ સરકારી સેવા ને પોતાના ઘરે પ્રાપ્ત કરી શકો છો. તમારે વીજળી નું કનેક્શન જોઈતું હોય, પાણીનું કનેક્શન જોઈતું હોય, રાશન કાર્ડ કઢાવવુ હોય,કઈ પણ સરકાર નું કામ હોય, આ નંબર પર ફોન લગાવવાથી તમારા કામ માટે જે તે સરકારી અધિકારી તમને યોગ્ય સમય માંગીને તમારા ઘરે આવીને તમારું કામ કરી જશે, હવે દિલ્હી માં કોઈને ક્યાંય ધક્કા ખાવાની જરૂર નથી. આ વ્યવસ્થા અમે પંજાબ માં પણ લાગુ કરવા જઈ રહ્યા છે, અને ગુજરાત માં સરકાર બનાવીને પછી ગુજરાતમાં પણ લાગુ કરશું. આજે તમે બધા અહીંયા બધી ધમકીઓ અને ડર સહન કરીને આવ્યા તે બદલ હું તમારા સૌનો આભારી છું.

જો આમ આદમી પાર્ટીની સરકાર બનશે તો કોઈ અધિકારી કોઈની પાસેથી 1 રૂપિયાની પણ લાંચ માંગવાની હિંમત નહીં કરેઃ ઈસુદાન ગઢવી

આમ આદમી પાર્ટીના રાષ્ટ્રીય સંયુક્ત મહામંત્રી ઇસુદાન ગઢવી એ જામનગરમાં વેપારીઓને સંબોધતા જણાવ્યું કે, ગુજરાતમાં કોઈપણ વેપારીએ ડરવાની જરૂર નથી. મને જાણવા મળ્યું છે કે કેટલાક અધિકારીઓએ વેપારીઓને અરવિંદ કેજરીવાલના કાર્યક્રમમાં ન આવવાની ધમકી આપી છે. મારે પૂછવું છે કે ગુજરાતના વેપારીઓ ને ધમકી આપનાર વ્યક્તિ ગુજરાતી હોઈ શકે? હું ગુજરાતના તમામ એસપી અને જિલ્લા મેજિસ્ટ્રેટ ને કહેવા માંગુ છું કે તમે લોકો એ મુખ્યમંત્રી અને કોઈપણ મંત્રી ના કહેવા પ્રમાણે નહીં પરંતુ બંધારણ પ્રમાણે કામ કરવાનું છે. બંધારણ અને લોકોની સેવા કરવાની આ જ વાસ્તવિક રાજનીતિ છે અને અમે આ જ કરવા આવ્યા છીએ. હું ગુજરાતના વેપારીઓને એક વચન આપવા માંગુ છું કે જો આમ આદમી પાર્ટીની સરકાર બનશે તો તમારી પાસેથી ₹1 ની પણ લાંચ માંગવાની કોઈ હિંમત નહીં કરે.

ગુજરાતના અધિકારીઓ દ્વારા વેપારીઓને ડરાવવા માં આવી રહ્યા છે કે તમે અરવિંદ કેજરીવાલની સભામાં જશો તો ત્યાં GSTના દરોડા પડશેઃ ગોપાલ ઈટાલિયા

આમ આદમી પાર્ટી ના ગુજરાત પ્રદેશ પ્રમુખ ગોપાલ ઈટાલિયા એ જામનગર ના વેપારીઓ સમક્ષ બોલતા જણાવ્યું કે, દરેક જનપ્રતિનિધિ એ લોકોની સમસ્યા સાંભળવા તેમની સમક્ષ આવવું જોઈએ, તે હમણાં જ શરૂ થયું છે. દેશમાં દરેક નેતા ભાષણ આપે છે, પરંતુ જનતાને માઈક આપીને જનતાને તેમની સમસ્યાઓ કહેવાની તક આપતા નથી. આ કામ માત્ર અરવિંદ કેજરીવાલ અને આમ આદમી પાર્ટી જ કરે છે. ગુજરાતના રાજકારણમાં આપણે જોયું નથી કે ભાજપ કે કોંગ્રેસ ના કોઈ મુખ્યમંત્રીએ જનતાને તેમની સામે બોલવાની તક આપી હોય.

આ પછી ગોપાલ ઇટાલિયા એ લોકોને કોલ રેકોર્ડિંગ સંભળાવ્યું. જેમાં ગુજરાતના વેપારીઓને અધિકારીઓ દ્વારા ડરાવવા માં આવી રહ્યા છે કે તમે અરવિંદ કેજરીવાલની સભામાં જશો તો ત્યાં જીએસટીના દરોડા પડશે.

આ કાર્યક્રમમાં અરવિંદ કેજરીવાલની સાથે આમ આદમી પાર્ટી ના ગુજરાત પ્રદેશ ચૂંટણી પ્રભારી ગુલાબસિંહ યાદવ, રાષ્ટ્રીય સંયુક્ત મહાસચિવ ઈસુદાન ગઢવી, આમ આદમી પાર્ટીના રાષ્ટ્રીય સંયુક્ત સચિવ ઈન્દ્રનીલ રાજગુરુ, આમ આદમી પાર્ટી ના ગુજરાત પ્રદેશ પ્રમુખ ગોપાલ ઈટાલિયા અને વિદ્યાર્થી નેતા યુવરાજસિંહ જાડેજા, જામનગર જિલ્લા પ્રમુખ પ્રકાશભાઈ દોંગા, જામનગર શહેર પ્રમુખ કરશનભાઈ કરમુર પણ ઉપસ્થિત રહ્યા હતા.

આમ આદમી પાર્ટી ગુજરાત

LEAVE A REPLY

Please enter your comment!
Please enter your name here