“ક્ષણમાં રિઝે તે શિવ અને ક્ષણમાં નારાજ થઈ જાય તે જીવ છે” – પ્રફુલભાઈ શુક્લ

લાખો ભક્તોની અખૂટ આસ્થાનું કેન્દ્ર એવા નવસારી જિલ્લાના ખેરગામ તાલુકાના જામનપાડા સ્થિત સુપ્રસિદ્ધ માવલી માતા મંદિર પરિસરમાં ચાલી રહેલી વિશ્વવિખ્યાત કથાકાર પ્રફુલભાઈ શુક્લની ૮૮૮મી મહાનવરાત્રી અનુષ્ઠાન અંતર્ગત રામકથાના આઠમા દિવસે ભવ્ય અને દિવ્ય માહોલ વચ્ચે ભગવાન રામેશ્વર પૂજન-અર્ચનનો મહોત્સવ ધામધૂમથી ઉજવાયો હતો. ભક્તિ, શ્રદ્ધા અને સંસ્કારથી ભરપૂર આ પ્રસંગે સમગ્ર વાતાવરણ “હર હર મહાદેવ”ના ગુંજારવથી ગુંજી ઊઠ્યું હતું.
કથાના આરંભ પહેલાં ઉપસ્થિત શ્રોતાજનો દ્વારા પરંપરાગત રીતે પોથી પૂજન તેમજ વ્યાસ પૂજન કરવામાં આવ્યું હતું. આ પાવન ક્ષણે ભક્તોમાં વિશેષ ભાવવિભોરતા જોવા મળી હતી. કથાના આચાર્ય શ્રી ગુણવંતભાઈ વિપ્ર અને હાર્દિક વિપ્ર દ્વારા આઠમા દિવસનો નવચંડીયજ્ઞ વિધિવત રીતે સંપન્ન કરાવવામાં આવ્યો હતો. યજ્ઞની પવિત્ર અગ્નિમાં આહુતિઓ અર્પણ થતી હતી અને મંત્રોચ્ચારથી સમગ્ર ધામ આધ્યાત્મિક ઊર્જાથી છલકાઈ ગયું હતું.
વ્યાસપીઠ પરથી કથાકાર પ્રફુલભાઈ શુક્લે પોતાના ઓજસ્વી વચનોમાં કહ્યું હતું કે, “મા ની કૃપા વરસે તો જીવનમાં સત્કર્મ થાય છે. શરણાગતિનો ભાવ ગિરિજાસ્તુતિમાં સમાયેલો છે. સંસારમાં બધાજ અપરાધોને ક્ષમા છે, પરંતુ સંત અપરાધને ક્યાંય ક્ષમા નથી.” તેમણે ભારપૂર્વક જણાવ્યું હતું કે ભરતજી રામાયણના સંત સમાન છે અને તેમના જીવનમાંથી ત્યાગ તથા સેવાભાવની પ્રેરણા લેવી જોઈએ.
કથાકાર પ્રફુલભાઈ શુક્લે ભાવસભર શબ્દોમાં જણાવ્યું હતું કે, “૮૮૮મી કથા મારા જીવનની યાદગાર કથા બની છે. સંયોગ સુખદ હોય તો વિયોગ દુઃખદ બને છે. જગતમાં જે ઝેર પીવે તે શિવ છે અને જે ઝેર ફેલાવે તે જીવ છે. ક્ષણમાં રિઝે તે શિવ છે અને ક્ષણમાં નારાજ થઈ જાય તે જીવ છે.” તેમના આ વિચારો સાંભળી શ્રોતાઓમાં આત્મમંથન અને આધ્યાત્મિક ચેતના જાગી ઉઠી હતી.
રામકથાના પ્રવાહમાં અયોધ્યાકાંડ, અરણ્યકાંડ, લંકાકાંડ તથા સુંદરકાંડની સિદ્ધ ચોપાઈઓનું પારાયણ તુલસી પીઠ પરથી પ્રફુલભાઈ શુક્લ દ્વારા કરાવવામાં આવ્યું હતું. તુલસીદાસજીના શબ્દોમાં રહેલી ભક્તિ અને તત્ત્વજ્ઞાનની મહિમા તેમણે સહજ અને સરળ ભાષામાં સમજાવી, જેના કારણે દરેક વર્ગના ભક્તો કથાથી જોડાઈ ગયા હતા.
આ પાવન દિવસે જ્યોત્સનાબેન જીતુભાઈ રાઠોડ અને તેમના પરિવાર દ્વારા ભગવાન રામેશ્વરનું વિશેષ પૂજન અને અભિષેક કરવામાં આવ્યો હતો. આયોજકો દ્વારા માટીના પાર્થિવ શિવલિંગની સ્થાપના કરવામાં આવી હતી, જે પ્રકૃતિ અને પરમાત્માની એકરૂપતાનું પ્રતીક બની રહી હતી. કુલ ૧૧ રસોથી ભગવાન રામેશ્વરનો અભિષેક કરવામાં આવ્યો હતો. દૂધ, દહીં, ઘી, મધ, ગંગાજળ સહિતના પવિત્ર દ્રવ્યો દ્વારા કરવામાં આવેલા અભિષેક સમયે ભક્તોની આંખોમાં અપરંપાર ભક્તિ ઝળહળી ઉઠી હતી.
કિશન દવે અને માક્ષિત રાજ્યગુરૂ દ્વારા રુદ્રી પાઠ કરવામાં આવ્યો હતો. વૈદિક મંત્રોના ઉચ્ચારણ સાથે “હર હર મહાદેવ”ના પ્રચંડ નાદથી સમગ્ર પરિસર ભક્તિરસમાં તરબતર બની ગયો હતો. ત્યારબાદ ઉપસ્થિત વિશાળ સંખ્યામાં ભાવિક ભક્તોએ સમૂહ આરતી ઉતારી ભગવાન રામેશ્વર અને માવલી માતાની કૃપા માટે પ્રાર્થના કરી હતી.
કથાના આમંત્રણને માન આપી પધારેલા બાલુભાઈ મહારાજ, હંસાબેન મહેશભાઈ દેસાઈ, મહારાજ શ્રી પ્રતિકભાઈ જોષી, નિતેશભાઈ સોનગરા, ચેતનભાઈ મિસ્ત્રી, અખંડેશ્વર યુવક મંડળ (બંધાડ ફ. આછવણી) સહિતના મહેમાનોનું સરપંચ શ્રી કોકિલાબેન કરસનભાઈ પટેલ, જગુભાઈ ગાવિત, મા ઘોડેશ્વરી સખી મંડળની બહેનો તથા અશ્વિનભાઈ પટેલ દ્વારા ભાવભર્યું સ્વાગત કરવામાં આવ્યું હતું.
આ પ્રસંગે ગંધર્વ વૃંદ દ્વારા ભક્તિપૂર્ણ કીર્તન રજૂ કરવામાં આવ્યું હતું. કીર્તનની તાલ અને સૂર સાથે ભક્તો ઝૂમી ઉઠ્યા હતા. સમગ્ર કાર્યક્રમની વ્યવસ્થા પ્રતીક પટેલ અને મુકેશ પટેલ દ્વારા સુચારુ રીતે સંભાળવામાં આવી હતી, જેના કારણે વિશાળ જનમેદની હોવા છતાં દરેક વ્યવસ્થા શિસ્તબદ્ધ રીતે ચાલતી રહી.
નિત્યક્રમ અનુસાર હજારોની સંખ્યામાં ઉપસ્થિત ભાવિક ભક્તોને મહાપ્રસાદ આપવામાં આવ્યો હતો. પ્રસાદ સ્વીકારતી વેળાએ ભક્તોના ચહેરા પર સંતોષ અને આનંદની ઝલક સ્પષ્ટ દેખાઈ રહી હતી. માવલી માતા મંદિર પરિસરમાં ચાલી રહેલી આ રામકથા માત્ર ધાર્મિક કાર્યક્રમ નહીં પરંતુ સમાજને સંસ્કાર, સમરસતા અને શાંતિનો સંદેશ આપતું મહાન અનુષ્ઠાન બની રહ્યું છે.
આવતીકાલે રામરાજ્યાભિષેકની કથા સાથે આ ભવ્ય રામકથાને વિરામ આપવામાં આવશે. રામરાજ્યના આદર્શો, ન્યાય, કરુણા અને સમતાની ભાવનાને ઉજાગર કરતી કથાની તૈયારીઓ આયોજકો દ્વારા પૂરજોશમાં કરવામાં આવી રહી છે. ભક્તોમાં આવતીકાલના સમાપન પ્રસંગને લઈને પણ વિશેષ ઉત્સાહ અને આતુરતા જોવા મળી રહી છે.