ભંડારી સમાજ નારગોલ દ્વારા ધાર્મિક અને આધ્યાત્મિક ભાવનાને પ્રોત્સાહન આપવાના હેતુથી શ્રી શિવ મહાપુરાણ કથાનું ભવ્ય આયોજન કરવામાં આવ્યું છે. શ્રાવણ સુદ આઠમથી શરૂ થનારી આ કથા તા. 20 ઓગસ્ટ, ગુરુવારથી તા. 28 ઓગસ્ટ, શુક્રવાર સુધી યોજાશે. કથાના માધ્યમથી ભગવાન શિવની મહિમા, ભક્તિ, ધર્મ અને આધ્યાત્મિક જીવનના સંદેશને લોકો સુધી પહોંચાડવાનો પ્રયાસ કરવામાં આવશે.
આ કથામાં કથાકાર પ.પૂ. શ્રી પ્રફુલભાઈ શુક્લ (સમર્થવક્તા) દ્વારા શિવ મહાપુરાણના વિવિધ પ્રસંગો અને ભગવાન શિવના જીવનચરિત્ર સાથે જોડાયેલા આધ્યાત્મિક પ્રસંગોનું રસાળ અને ભાવસભર વર્ણન કરવામાં આવશે. કથા દરમિયાન મોટી સંખ્યામાં શ્રદ્ધાળુઓ ઉપસ્થિત રહી શિવકથાનો લાભ લે તેવી આયોજકો દ્વારા અપીલ કરવામાં આવી છે.
આયોજિત કાર્યક્રમ મુજબ તા. 20 ઓગસ્ટે ગુરુવારે બપોરે 2થી સાંજે 5 વાગ્યા સુધી કથાનો પ્રારંભ થશે. ત્યારબાદ તા. 28 ઓગસ્ટ, શુક્રવારે કથાનો વિરામ રહેશે. કથા પ્રસંગે શ્રદ્ધાળુઓ માટે ભોજન પ્રસાદની પણ વ્યવસ્થા કરવામાં આવી છે. ‘જાહેર આમંત્રણ’ સાથે આયોજકોએ ભક્તજનોને શિવ કથામૃત પાન કરવા પધારવા ભાવભર્યું આમંત્રણ પાઠવ્યું છે.
કથા માટેનું સ્થળ શ્રીમતી ઉમિયાબેન ગજાનન પટેલ પરિવાર સાંસ્કૃતિક ભવન, ભંડારી સમાજ નારગોલ, જગંભાભાઈ-નારગોલ ખાતે નક્કી કરવામાં આવ્યું છે. સમગ્ર કાર્યક્રમનું આયોજન ભંડારી સમાજ નારગોલ, શ્રી શેપવંશીય ક્ષત્રિય દેવકર ભંડારી સમાજ દ્વારા કરવામાં આવી રહ્યું છે. કથાના આયોજનને લઈને સમાજના આગેવાનો અને સભ્યો દ્વારા તૈયારીઓ હાથ ધરવામાં આવી છે.