માતા-બાળકના પોષણ, આરોગ્ય અને શિક્ષણ અંગે માર્ગદર્શન; આંગણવાડી બહેનોનું સન્માન અને માતા-બાળકોને કીટનું વિતરણ
નાનાપોંઢા તાલુકાના અરનાલા ગામે 25 સપ્ટેમ્બરથી 3 ઓક્ટોબર દરમિયાન યોજાનારા ‘વિકસિત ભારત જન સેવા અભિયાન’ અંતર્ગત આંગણ મિલન સેવા કાર્યક્રમ કપરાડાના ધારાસભ્ય જીતુભાઈ ચૌધરીના અધ્યક્ષસ્થાને યોજાયો હતો. કાર્યક્રમમાં માતા અને બાળકના આરોગ્ય, પોષણ, શિક્ષણ, સ્વચ્છતા તથા સરકારની વિવિધ કલ્યાણકારી યોજનાઓ અંગે માર્ગદર્શન આપવામાં આવ્યું હતું.
પોષણયુક્ત આહારથી માતા-બાળકનું સ્વાસ્થ્ય જળવાય
કાર્યક્રમમાં કપરાડાના ધારાસભ્ય જીતુભાઈ ચૌધરીએ જણાવ્યું હતું કે પરિવાર અને બાળકોના સારા સ્વાસ્થ્ય માટે પોષણયુક્ત આહાર ખૂબ જ જરૂરી છે. ચણા, મગ સહિતના પ્રોટીનયુક્ત ખોરાકનું સેવન શરીરને જરૂરી પોષણ પૂરું પાડે છે. માતા અને બાળકનું સ્વાસ્થ્ય સારું રહે તે માટે સરકાર દ્વારા વિવિધ યોજનાઓ અમલમાં મૂકવામાં આવી રહી છે.
તેમણે જણાવ્યું કે બાળકના સર્વાંગી વિકાસ માટે માત્ર શિક્ષણ જ નહીં, પરંતુ પોષણ, સ્વચ્છતા અને સારા સંસ્કાર પણ જરૂરી છે. આંગણવાડી કાર્યકરો અને આશા વર્કરો દ્વારા બાળકો અને માતાઓની સતત કાળજી લેવામાં આવે છે. તેમના પ્રયાસોથી બાળકોમાં શરૂઆતથી જ સ્વચ્છતા, શિક્ષણ અને સંસ્કારના પાયા મજબૂત બને છે.
સ્માર્ટ આંગણવાડી તરફ આગળ વધતું તંત્ર
ધારાસભ્યએ જણાવ્યું હતું કે આંગણવાડી કેન્દ્રોને હવે સ્માર્ટ આંગણવાડી તરીકે વિકસાવવામાં આવી રહ્યા છે. બાળકોને આકર્ષક વાતાવરણમાં શિક્ષણ મળે તે માટે આંગણવાડી કેન્દ્રોમાં વિવિધ ચિત્રો અને શૈક્ષણિક સામગ્રીનો ઉપયોગ કરવામાં આવે છે. રમતગમત અને નવી શિક્ષણ પદ્ધતિના માધ્યમથી બાળકોને શીખવવામાં આવે છે, જેથી તેઓ શાળામાં પ્રવેશ કરે ત્યારે મૂળભૂત બાબતો અંગે પરિચિત હોય.
તેમણે આંગણવાડી બહેનો અને આશા વર્કરોને બાળકોના આરોગ્ય તથા વિકાસમાં મહત્વની ભૂમિકા ભજવવા બદલ અભિનંદન પાઠવ્યા હતા. સાથે જ બાળલગ્ન અટકાવવા અંગે પણ જાગૃતિ લાવવાની જરૂરિયાત વ્યક્ત કરી હતી. તેમણે કાયદા મુજબ 18 વર્ષની ઉંમર બાદ જ યુવતીઓના લગ્ન થાય તે માટે પરિવાર અને સમાજે જાગૃત રહેવા અપીલ કરી હતી.
છેવાડાના માનવી સુધી યોજનાઓનો લાભ પહોંચાડવાનો હેતુ
નાનાપોંઢા પ્રભારી અને પૂર્વ જિલ્લા પંચાયત સદસ્ય શૈલેષભાઈ પટેલે જણાવ્યું હતું કે ‘વિકસિત ભારત જન સેવા અભિયાન’નો મુખ્ય હેતુ છેવાડાના માનવી સુધી વિકાસ અને સરકારી યોજનાઓનો લાભ પહોંચાડવાનો છે. પંડિત દિનદયાળ ઉપાધ્યાયના અંત્યોદયના વિચારને સાકાર કરવા માટે સમાજના અંતિમ વ્યક્તિ સુધી સરકારની યોજનાઓ પહોંચે તે જરૂરી છે.
તેમણે જણાવ્યું કે માતા અને બાળકના પોષણ, આરોગ્ય અને શિક્ષણ માટે સરકાર દ્વારા વિવિધ યોજનાઓ ચલાવવામાં આવી રહી છે. આંગણવાડી કેન્દ્રો દ્વારા આ યોજનાઓનો લાભ લાભાર્થીઓ સુધી પહોંચાડવામાં મહત્વની ભૂમિકા ભજવવામાં આવે છે.
માતા-બાળકોને કીટ, આંગણવાડી બહેનોનું સન્માન
કાર્યક્રમ દરમિયાન માતા અને બાળકોને કીટનું વિતરણ કરવામાં આવ્યું હતું. આ ઉપરાંત આંગણવાડી બહેનોને પ્રમાણપત્ર આપી સન્માનિત કરવામાં આવી હતી. કાર્યક્રમમાં ઉપસ્થિત આગેવાનો દ્વારા માતા-બાળકના આરોગ્ય અને પોષણ અંગે જરૂરી માર્ગદર્શન આપવામાં આવ્યું હતું.
કાર્યક્રમમાં નાનાપોંઢા તાલુકા પંચાયત પ્રમુખ મનિષાબેન પટેલ, ચીવલ તાલુકા પંચાયત સદસ્ય જીતેન્દ્ર પટેલ, અરનાલા ગામના સરપંચ સરિતાબેન પટેલ, ગામના અગ્રણી રોહીનભાઈ સૂઈ, દિનેશભાઈ પટેલ સહિત આગેવાનો, આંગણવાડી કાર્યકરો, આશા વર્કરો અને ગ્રામજનો મોટી સંખ્યામાં ઉપસ્થિત રહ્યા હતા. સમગ્ર કાર્યક્રમનું સંચાલન સી.ડી.પી.ઓ. રીટાબેન પટેલ દ્વારા કરવામાં આવ્યું હતું.
