ગુસ્સાની પાછળનું સત્ય
ઘણા પરિવારોમાં વારંવાર એવી ફરિયાદ સાંભળવામાં આવે છે કે પતિ બહુ ગુસ્સે થઈ જાય છે. સામાન્ય રીતે ગુસ્સાને ખરાબ સ્વભાવ માનવામાં આવે છે, પરંતુ દરેક ગુસ્સાની પાછળ કોઈને કોઈ કારણ છુપાયેલું હોય છે. પુરુષનો ગુસ્સો ઘણી વખત તેના મનમાં ભરાયેલા તણાવ, ચિંતા અને જવાબદારીઓનું પ્રતિબિંબ હોય છે.
પુરુષને બાળપણથી જ શીખવવામાં આવે છે કે તે મજબૂત રહે, રડવું નહીં અને પોતાની સમસ્યાઓ પોતે જ ઉકેલવી. પરિણામે ઘણા પુરુષો પોતાના મનની વાત કોઈને કહી શકતા નથી. જ્યારે અંદર લાગણીઓ દબાઈ રહે છે ત્યારે તે ધીમે ધીમે ભારણ બની જાય છે. આ ભારણ ક્યારેક ગુસ્સા રૂપે બહાર આવે છે.
ઘણા પુરુષો પરિવારની જવાબદારીને લઈને સતત વિચારમાં રહે છે. ઘરખર્ચ, બાળકોનું ભવિષ્ય, નોકરીની ચિંતા અને સમાજમાં સન્માન જાળવવાની જવાબદારી તેમને અંદરથી તણાવમાં રાખે છે. બહારથી તેઓ શાંત દેખાય છે, પરંતુ અંદરથી તેઓ અનેક પ્રશ્નો સાથે સંઘર્ષ કરતા હોય છે. જ્યારે આ તણાવ વધારે વધી જાય છે ત્યારે નાની વાત પર પણ ગુસ્સો આવી જાય છે.
ઘણી વખત પુરુષ પોતાનો દુઃખ શબ્દોમાં વ્યક્ત કરી શકતો નથી. તેને લાગે છે કે પોતાની નબળાઈ બતાવવી યોગ્ય નથી. તેથી તે મૌન રહે છે. પરંતુ આ મૌન ક્યારેક ભારે બની જાય છે અને ગુસ્સા તરીકે બહાર આવે છે.
એટલે સ્ત્રી અને પરિવારના સભ્યો માટે જરૂરી છે કે તેઓ પુરુષના ગુસ્સાને માત્ર સ્વભાવ તરીકે ન માને. ઘણીવાર તે ગુસ્સો મનની પીડાનો અવાજ હોય છે. જો પતિને શાંતિથી સાંભળવામાં આવે, તેની ચિંતા સમજવામાં આવે અને તેને વિશ્વાસ અપાય કે તે એકલો નથી, તો તેનો ગુસ્સો ધીમે ધીમે ઓછો થઈ શકે છે.
સાચી સમજણ એ છે કે ગુસ્સાની પાછળનું સત્ય સમજવું. જ્યારે પરિવાર પુરુષની લાગણીઓને સમજે છે ત્યારે સંબંધોમાં પ્રેમ અને વિશ્વાસ વધે છે. સુખી પરિવાર માટે ગુસ્સાને નહીં, પરંતુ ગુસ્સાની પાછળની લાગણીઓને સમજવાની જરૂર છે.
***********
આવતી કાલે વાચો
👇👇👇👇👇👇👇
પુરુષ પણ લાગણીશીલ છે
