“કામ, ક્રોધ અને લોભ રૂપિ મહીસાસુર નો નાશ કરવા માટે માઁ અંબાનું પ્રાગટ્ય થયું છે” : પ્રફુલભાઈ શુક્લ

ખેરગામ ખાતે આવેલા જગદંબાધામ દેસાઈ વાડમાં ચાલી રહેલી વિશ્વ વિખ્યાત કથાકાર પ્રફુલભાઈ શુક્લની ૮૯૦મી દેવીભાગવત કથામાં આજે માઁ અંબાના પ્રાગટ્યનો ભવ્ય ઉત્સવ ધાર્મિક શ્રદ્ધા અને ભાવનાથી ઉજવાયો હતો. કથાના ચોથા દિવસે યોજાયેલ આ પ્રસંગે મોટી સંખ્યામાં ભક્તો અને શ્રોતાઓ ઉમટી પડ્યા હતા, જેના કારણે સમગ્ર વિસ્તાર ભક્તિમય માહોલમાં રંગાઈ ગયો હતો.
આ પ્રસંગે વ્યાસપીઠ પરથી કથાકાર પ્રફુલભાઈ શુક્લએ ખૂબ જ ભાવુક શબ્દોમાં જણાવ્યું હતું કે, “કામ, ક્રોધ અને લોભ રૂપિ મહીસાસુરનો નાશ કરવા માટે માઁ અંબાનું પ્રાગટ્ય થયું છે. જ્યારે માનવ જીવનમાં નકારાત્મકતા વધે છે ત્યારે દૈવી શક્તિઓનું પ્રાગટ્ય થાય છે. માઁ અંબા માત્ર પૂજા માટે નહીં પરંતુ માનવ જીવનમાં સદાચાર, સંયમ અને સદ્ગુણોને જાળવવા માટે પ્રગટ થાય છે.” તેમના આ પ્રેરણાદાયી પ્રવચનથી ભક્તોમાં નવી ઉર્જા અને આધ્યાત્મિક ભાવના જગૃત થઈ હતી.
આજના કાર્યક્રમમાં નવચંડી યજ્ઞનો ચોથો દિવસ પણ ભવ્ય રીતે યોજાયો હતો. નવચંડી યજ્ઞના મનોરથી તરીકે લીલાબેન નટુભાઈ પટેલ (અટગામ)એ યજમાન પદ સંભાળ્યું હતું. યજ્ઞ દરમિયાન વૈદિક મંત્રોચ્ચાર અને હવનવિધિ દ્વારા સમગ્ર વાતાવરણ પવિત્ર બની ગયું હતું. યજ્ઞમાં હાર્દિકભાઈ અમદાવાદી, ભક્તિ ભંડાર ખેરગામના હિતેષભાઈ રાણા તથા બિમલભાઈ પટેલે સહભાગી બની ધર્મલાભ મેળવ્યો હતો.
આ પ્રસંગે વિવિધ રાજકીય, સામાજિક અને શૈક્ષણિક ક્ષેત્રના અગ્રણીઓ પણ ઉપસ્થિત રહ્યા હતા. ખાસ કરીને નવસારી જિલ્લા ભાજપના ઉપપ્રમુખ અશોકભાઈ ગજેરા, જિલ્લા મહિલા મોર્ચાના પ્રમુખ સુમિત્રાબેન માહલા, ખેરગામ કોલેજના પ્રિન્સિપાલ ડો. સંજયભાઈ પટેલ, કિસાન મોર્ચાના ઉપપ્રમુખ આશિષભાઈ દેસાઈ, મહિલા મોર્ચાના ઉપપ્રમુખ લીનાબેન અમદાવાદી, દમયંતીબેન ખંડુભાઈ સોલંકી, જિલ્લા યુવા મોર્ચાના મંત્રી સુરજભાઈ પટેલ તથા રંજનબેન સોલંકી (સુરત) સહિત અનેક મહાનુભાવો હાજર રહ્યા હતા.
કાર્યક્રમમાં ઉપસ્થિત મહેમાનોનું સ્વાગત ખેરગામ બ્રહ્મ સમાજના પ્રમુખ અંકુરભાઈ શુક્લ, કિશનભાઈ દવે, પ્રતિકભાઈ પટેલ, બિપીનભાઈ પટેલ અને રાજેશભાઈ પટેલ દ્વારા ઉષ્માભેર કરવામાં આવ્યું હતું. ઉપરાંત સુરત બ્રહ્મ સમાજના અગ્રણીઓ સુરેશભાઈ જાની, યોગેશભાઈ જોષી, પ્રવીણભાઈ દવે અને મહેશભાઈ દવે પણ ખાસ હાજર રહ્યા હતા, જેમનું પણ સન્માન સાથે સ્વાગત કરવામાં આવ્યું હતું.
આ પ્રસંગે ધાર્મિક કાર્યક્રમ સાથે સામાજિક સેવા પ્રવૃત્તિ પણ યોજાઈ હતી. શ્રદ્ધા સેવા ટ્રસ્ટ અને શુશ્રુવા બ્લડ સેન્ટર દ્વારા ભવ્ય રક્તદાન શિબિરનું આયોજન કરવામાં આવ્યું હતું. આ રક્તદાન શિબિરનું ઉદ્ઘાટન નવસારી જિલ્લા ભાજપના ઉપપ્રમુખ અશોકભાઈ ગજેરાના વરદ હસ્તે કરવામાં આવ્યું હતું. શિબિરમાં યુવાનો અને ભક્તોએ ઉત્સાહપૂર્વક ભાગ લીધો હતો અને મોટી સંખ્યામાં રક્તદાતાઓએ માનવસેવામાં પોતાનું યોગદાન આપ્યું હતું. ખાસ નોંધનીય વાત એ રહી કે ડો. પંકજભાઈ એસ. પટેલે ૫૫મી વાર રક્તદાન કરી સમાજ માટે પ્રેરણાદાયી ઉદાહરણ પૂરું પાડ્યું હતું.
આ કાર્યક્રમ દરમિયાન એક ગૌરવપૂર્ણ ક્ષણ પણ સર્જાઈ હતી. વર્ષ ૨૦૨૫-૨૬ દરમિયાન ગુજરાત હાઇકોર્ટ દ્વારા યોજાયેલી કેડર ઓફ સિવિલ જજની પરીક્ષામાં સફળતા મેળવનાર એડવોકેટ મનોજકુમાર રમણીકભાઈ દવે (ગામ: માલપરા)નું વિશિષ્ટ સન્માન કરવામાં આવ્યું હતું. તેઓ સિહોર સંપ્રદાય ઔદીચ્ય બ્રહ્મ સમાજના યુવા પ્રમુખ છે અને સુરત જિલ્લા ન્યાયાલયમાં પ્રેક્ટિસ પણ કરે છે. તેમની સફળતાને સમગ્ર ખેરગામ બ્રહ્મ સમાજ અને કથાના આયોજકો દ્વારા ગૌરવનો વિષય ગણાવવામાં આવ્યો હતો. આ પ્રસંગે કથાકાર પ્રફુલભાઈ શુક્લએ પણ તેમને આશીર્વાદ આપ્યા હતા અને યુવાઓને મહેનત, સંયમ અને સંસ્કારથી જીવનમાં આગળ વધવા માટે પ્રેરિત કર્યા હતા.
દેવીભાગવત કથાના આજના પ્રધાન ઉત્સવમાં ભક્તો માટે વિશેષ ભજન-કીર્તન અને આરતીનું આયોજન કરવામાં આવ્યું હતું. સાંજના સમયે માઁ અંબાની ભવ્ય આરતી સાથે સમગ્ર પરિસર ભક્તિરસમાં ડૂબી ગયું હતું. હજારો ભક્તોએ માઁ અંબાના દર્શન કરી ધર્મલાભ મેળવ્યો હતો. કથાના માધ્યમથી ધાર્મિક જાગૃતિ સાથે સામાજિક એકતા અને સેવા ભાવના પણ મજબૂત બનતી જોવા મળી રહી છે.
કાર્યક્રમને સફળ બનાવવા માટે ખેરગામ બ્રહ્મ સમાજના તમામ કાર્યકરો અને સ્વયંસેવકો દ્વારા ખૂબ જ મહેનત કરવામાં આવી હતી. અંતમાં ખેરગામ બ્રહ્મ સમાજના પ્રમુખ અંકુરભાઈ શુક્લએ તમામ મહેમાનો, દાતાઓ અને ભક્તોનો આભાર વ્યક્ત કર્યો હતો. તેમણે જણાવ્યું હતું કે આવી ધાર્મિક કથાઓ માત્ર આધ્યાત્મિક શાંતિ આપતી નથી પરંતુ સમાજમાં સકારાત્મકતા અને સંસ્કારોનો સંદેશ પણ આપે છે.
આ રીતે જગદંબાધામ દેસાઈ વાડ ખાતે ચાલી રહેલી દેવીભાગવત કથાનો આજનો દિવસ માઁ અંબાના પ્રાગટ્ય ઉત્સવ અને સામાજિક સેવાકીય પ્રવૃત્તિઓ સાથે ભવ્ય અને યાદગાર બની રહ્યો હતો. ભક્તો માટે આ કાર્યક્રમ માત્ર ધાર્મિક પ્રસંગ નહીં પરંતુ આધ્યાત્મિક ઊર્જા અને સામાજિક સંકલ્પનો ઉત્સવ સાબિત થયો હતો.