ધરમપુર તાલુકાના હનમતમાળ ગામમાં દેશસેવા બાદ નિવૃત્ત થયેલા ભારતીય સેનાના જવાન વિનોદભાઈ રાઉતનું ભવ્ય સન્માન સમારોહ હનમતમાળ પ્રાથમિક શાળાના આંગણે હરિશ આર્ટ ગ્રુપના સંકલન અને હરીશભાઈ પટેલની અધ્યક્ષતામાં યોજાયો હતો. સમગ્ર કાર્યક્રમમાં ગામના ગ્રામજનો, શાળા પરિવાર, આરોગ્ય વિભાગ, બાળકોથી લઇ નિવૃત્ત શિક્ષકો સુધીની ઉમદા હાજરી રહી હતી.
સન્માન સમારોહ દરમિયાન વિદ્યાર્થીઓએ સ્ફૂર્તિભેર સંગીત અને સંગઠન કાર્યક્રમ રજૂ કર્યા અને નિવૃત્ત જવાનને ફૂલોની હાર, સમૃદ્ધિ ભેટ અને મોમેન્ટો આપીને સન્માનિત કરવામાં આવ્યા. હરિશભાઈ પટેલે પોતાના પ્રવચનમાં જણાવ્યું કે વિનોદભાઈ રાઉત જેવા યોદ્ધાઓ ગામનું અને સમગ્ર આદિવાસી સમાજનું ગૌરવ છે. તેમણે વધુમાં કહ્યું કે, વિદ્યાર્થીઓએ શિક્ષણને જીવનમાં પ્રાથમિકતા આપવી જોઈએ અને આવાં દેશસેવકોને આદર્શ બનાવી પોતાનું ભવિષ્ય ઘડવું જોઈએ.
વિનોદભાઈ રાઉતે સન્માન મેળવતાં ભાવુક બની જણાવ્યું કે, “મારા પોતાં ગામના બાળકો, શિક્ષકો અને આરોગ્યકર્મીઓ તરફથી મળતું આ સન્માન મારા માટે એ જટિલ સંઘર્ષભર્યા સેના જીવનના શાંતિભર્યા પુરસ્કાર સમાન છે.” તેમણે વધુમાં ઉમેર્યું કે, “મારું જીવન દેશની સેવા માટે સમર્પિત રહ્યું અને હવે ઇચ્છા છે કે, હું ગામના યુવાઓને દેશસેવા અને સરકારી નોકરી તરફ પ્રેરિત કરી શકું.”
કાર્યક્રમમાં ભગુભાઈ પટેલ, વિજયભાઈ માહલા, ઝીણાભાઈ પવાર, સુરેશભાઈ ગાયકવાડ, જયેશભાઈ અને આનંદભાઈ સહિત ગ્રામજનો મોટી સંખ્યામાં હાજર રહ્યા હતા. વિધાર્થીઓ અને શાળાના સમગ્ર સ્ટાફે પણ ઉત્સાહપૂર્વક ભાગ લીધો હતો.
વિશેષે ઉલ્લેખનીય છે કે, કાર્યક્રમમાં નિવૃત્ત શિક્ષક દ્વારા તમામ ગ્રામજનો માટે પ્રીતિભોજનનું આયોજન કરવામાં આવ્યું હતું. સમગ્ર કાર્યક્રમનું સંચાલન શાળાના આચાર્ય અને શિક્ષકમંડળે કરી ધાર્મિક, સાંસ્કૃતિક અને રાષ્ટ્રભક્તિથી ભરપૂર વાતાવરણ સર્જ્યું હતું.
હનમતમાળના આ ઉદાહરણજનક સન્માન કાર્યક્રમ દ્વારા લોકોમાં રાષ્ટ્રસેના માટે ગૌરવ અને આધુનિક પેઢીમાં દેશસેવાની ભાવનાને ઉત્તેજન મળ્યું છે.
