સેલવાસમાં ગેસ ગોડાઉનમાં ભીષણ બ્લાસ્ટ: 4નાં મોત, 8 ઘાયલ – સ્કૂલથી માત્ર 30 મીટર દૂર ઘટનાથી હાહાકાર
સંઘપ્રદેશ દાદરા અને નગર હવેલીના હૃદય સમાન સેલવાસ શહેરના ડેમ વિસ્તાર નજીક આવેલા એક ગેસ ગોડાઉનમાં મધરાત્રી દરમિયાન થયેલા ભીષણ વિસ્ફોટથી સમગ્ર વિસ્તાર ધ્રૂજી ઉઠ્યો હતો. આ દુર્ઘટનામાં 4 શ્રમિકોના ઘટનાસ્થળે જ કરુણ મોત નિપજ્યા છે, જ્યારે 8 જેટલા લોકો ગંભીર રીતે ઇજાગ્રસ્ત થતા તેમને તાત્કાલિક હોસ્પિટલમાં ખસેડવામાં આવ્યા છે. ઘટનાને પગલે સમગ્ર પંથકમાં ભય અને ગભરાટનો માહોલ સર્જાયો છે.
મળતી માહિતી મુજબ, ગોડાઉનમાં નાઇટ્રોજન તેમજ અન્ય ઔદ્યોગિક ગેસનો સંગ્રહ કરવામાં આવતો હતો. મધરાત્રીના સમયે અચાનક જ પ્રચંડ ધડાકો થતા આસપાસના રહેણાંક વિસ્તારો અને ઇમારતો ધ્રૂજી ઉઠી હતી. વિસ્ફોટનો અવાજ એટલો જોરદાર હતો કે અનેક કિલોમીટર દૂર સુધી સંભળાયો હતો. ખાસ કરીને ચોંકાવનારી બાબત એ છે કે આ જોખમી ગોડાઉન એક શાળાથી માત્ર 30 મીટરના અંતરે આવેલું હતું. જો આ ઘટના દિવસ દરમિયાન બની હોત, તો મોટી જાનહાનિ થવાની ભીતિ વ્યકત કરવામાં આવી રહી છે.
ઘટનાસ્થળે જ 4 શ્રમિકોના મોત
વિસ્ફોટ એટલો પ્રચંડ હતો કે ગોડાઉનમાં કામ કરતા 3 શ્રમિકોના શરીરો લોહીલુહાણ હાલતમાં ઘટનાસ્થળે જ મળ્યા હતા. આ ઘટનાએ તેમના પરિવારજનોમાં શોકની લાગણી છવાઈ ગઈ છે. મૃતકોના પરિવારજનોમાં આક્રંદ મચી ગયો હતો. બીજી તરફ 8 જેટલા ઇજાગ્રસ્તોને તાત્કાલિક નજીકની હોસ્પિટલમાં દાખલ કરવામાં આવ્યા છે, જ્યાં તેમની સારવાર ચાલી રહી છે.
ફાયર બ્રિગેડ અને બચાવ કામગીરી
ઘટનાની જાણ થતાં જ દાદરા અને નગર હવેલી ફાયર વિભાગના જવાનો તાત્કાલિક ઘટનાસ્થળે પહોંચી ગયા હતા. ફાયર ટીમે આગને કાબૂમાં લેવા માટે જોરદાર પ્રયત્નો હાથ ધર્યા હતા અને કલાકોની મહેનત બાદ આગ પર નિયંત્રણ મેળવવામાં સફળતા મેળવી હતી. બચાવ કામગીરી દરમિયાન આસપાસના વિસ્તારોને ખાલી કરાવવામાં આવ્યા હતા, જેથી વધુ જાનહાનિ અટકાવી શકાય.
ફોરેન્સિક તપાસ શરૂ
વિસ્ફોટના ચોક્કસ કારણોની તપાસ કરવા માટે મોબાઇલ ફોરેન્સિક ટીમને પણ ઘટનાસ્થળે બોલાવવામાં આવી હતી. ટીમ દ્વારા સ્થળ પરથી પુરાવા એકત્રિત કરવાની કામગીરી હાથ ધરવામાં આવી છે. આ મોબાઇલ ફોરેન્સિક વાનની મદદથી પુરાવાઓ તાત્કાલિક તપાસ માટે મોકલી શકાય છે, જેના કારણે તપાસની પ્રક્રિયા વધુ ઝડપી અને અસરકારક બની શકે છે. અધિકારીઓએ જણાવ્યું છે કે ગેસ લીકેજ કે અન્ય ટેકનિકલ ખામી બ્લાસ્ટનું કારણ હોઈ શકે છે, પરંતુ અંતિમ નિર્ણય તપાસ બાદ જ લેવામાં આવશે.
સાંસદ ઉમેશ પટેલે મુલાકાત લીધી
ઘટનાની જાણ થતા દમણના સાંસદ ઉમેશ પટેલ તાત્કાલિક સેલવાસ પહોંચી ગયા હતા. તેમણે હોસ્પિટલમાં દાખલ ઇજાગ્રસ્તોની મુલાકાત લીધી હતી તેમજ મૃતકોના પરિવારજનોને સાંત્વના આપી હતી. આ ઉપરાંત તેમણે ઘટનાસ્થળે જઈને સ્થિતિનું નિરીક્ષણ પણ કર્યું હતું. સાંસદે જણાવ્યું હતું કે રહેણાંક વિસ્તાર અને શાળાની નજીક આવા જોખમી ગોડાઉનને મંજૂરી આપવાની પ્રક્રિયા પર ગંભીર પ્રશ્નો ઊભા થાય છે અને જવાબદારો સામે કડક કાર્યવાહી થવી જોઈએ.
કલેક્ટરનો નિવેદન
દાદરા અને નગર હવેલીના કલેક્ટર પ્રિયાંક કિશોરે જણાવ્યું હતું કે સમગ્ર ઘટનાની ઊંડાણપૂર્વક તપાસ ચાલી રહી છે. ગોડાઉનમાં કયા પ્રકારના ગેસનો સંગ્રહ કરવામાં આવતો હતો અને બ્લાસ્ટનું ચોક્કસ કારણ શું છે તે અંગે તપાસ ચાલુ છે. તેમણે ઉમેર્યું કે જો આ ગોડાઉન ગેરકાયદેસર રીતે ચાલતું હોવાનું સામે આવશે, તો સંબંધિત લોકો સામે કડક કાર્યવાહી કરવામાં આવશે.
સ્થાનિકોમાં ભય અને રોષ
ઘટનાના સાક્ષી બનેલા સ્થાનિક લક્ષ્મણભાઈએ જણાવ્યું હતું કે, “અચાનક જ જોરદાર ધડાકો થયો અને અમે ગભરાઈને બહાર દોડ્યા. વિસ્ફોટના કારણે અમારા મકાનની બારીઓના કાચ તૂટી ગયા અને પાર્ક કરેલી ગાડીનું પણ નુકસાન થયું. ગેસના બાટલા ઊડીને દૂર સુધી ફેંકાયા હતા. અમે માંડમાંડ બચ્યા છીએ.”
આ ઘટનાએ સમગ્ર વિસ્તારમાં ભયનો માહોલ સર્જી દીધો છે. સ્થાનિક લોકોમાં પણ ભારે રોષ જોવા મળી રહ્યો છે અને તેઓએ માંગણી કરી છે કે રહેણાંક વિસ્તારોની નજીક આવેલા આવા જોખમી ગોડાઉનોને તરત જ દૂર કરવામાં આવે.
આ પ્રચંડ બ્લાસ્ટ અને 4 જીવના કરુણ અંત બાદ હવે પ્રશાસન અને સુરક્ષા તંત્ર પર અનેક સવાલો ઊભા થયા છે. લોકો રાહ જોઈ રહ્યા છે કે તપાસ પૂર્ણ થયા બાદ જવાબદારો સામે કઈ પ્રકારની કાર્યવાહી કરવામાં આવશે.
