ભાવનગર જિલ્લાના ખરકડી ગામમાં નકલી દારૂના સેવન બાદ થયેલા મોત અને અનેક લોકોની તબિયત લથડવાની ગંભીર ઘટનાએ સમગ્ર ગુજરાતમાં ચિંતા ઊભી કરી છે. આ ઘટનાના પગલે હવે દક્ષિણ ગુજરાતમાં પણ નકલી અને ભેળસેળયુક્ત દારૂના જથ્થા અંગે સઘન તપાસ હાથ ધરવાની જરૂરિયાત ઉભી થઈ છે.
ગુજરાતમાં દારૂબંધી હોવા છતાં સમયાંતરે ગેરકાયદે દારૂના જથ્થા ઝડપાતા રહે છે. ખાસ કરીને દારૂની હેરાફેરી સાથે સંકળાયેલા તત્વો દ્વારા બહારના રાજ્યોમાંથી લાવવામાં આવતા શંકાસ્પદ દારૂના જથ્થાની તપાસ જરૂરી બની છે. ભાવનગરની ઘટનામાં બહારથી દારૂનો જથ્થો લાવવામાં આવ્યો હોવાના અહેવાલો સામે આવ્યા છે ત્યારે દક્ષિણ ગુજરાતમાં પણ આવી જ રીતે કોઈ શંકાસ્પદ જથ્થો પ્રવેશ્યો છે કે નહીં તેની તપાસ કરવાની માંગ ઉઠી છે.
વલસાડ, નવસારી, સુરત, તાપી અને ડાંગ જેવા દક્ષિણ ગુજરાતના જિલ્લાઓમાં પોલીસ અને સંબંધિત તપાસ એજન્સીઓ દ્વારા હોટસ્પોટ વિસ્તારો, શંકાસ્પદ ગોડાઉન, હેરાફેરીના રૂટ અને ગેરકાયદે દારૂના વેચાણ સાથે સંકળાયેલા તત્વોની તપાસ કરવામાં આવે તેવી માંગ છે. ખાસ કરીને મહારાષ્ટ્ર અને અન્ય રાજ્યો સાથે જોડાયેલા માર્ગો પર વાહનોની ચકાસણી અને શંકાસ્પદ દારૂના જથ્થાની તપાસ વધુ અસરકારક બનાવવાની જરૂર છે.
સાથે જ અગાઉ ઝડપાયેલા દારૂના કેસોમાં સંડોવાયેલા આરોપીઓની ફરીથી તપાસ કરી તેમના સંપર્કો અને સપ્લાય નેટવર્ક અંગે માહિતી મેળવવી જરૂરી છે. જો ક્યાંય નકલી બોટલ, શંકાસ્પદ પ્રવાહી અથવા ભેળસેળની સામગ્રી મળે તો તેના નમૂના ફોરેન્સિક તપાસ માટે મોકલવા જોઈએ.
નકલી દારૂનો મુદ્દો માત્ર કાયદો અને વ્યવસ્થાનો પ્રશ્ન નથી, પરંતુ લોકોના જીવન સાથે સીધો સંકળાયેલો ગંભીર જાહેર આરોગ્યનો મુદ્દો છે. તેથી ભાવનગરની ઘટના બાદ દક્ષિણ ગુજરાતમાં પણ આગોતરી અને સઘન તપાસ હાથ ધરી કોઈ અનિચ્છનીય ઘટના બને તે પહેલાં ગેરકાયદે નેટવર્ક સામે કાર્યવાહી કરવાની માંગ ઉઠી છે.