વલસાડ: વલસાડ જિલ્લા પોલીસ તંત્રમાં વહીવટી સરળતા અને કાયદો-વ્યવસ્થાની કામગીરીને વધુ સુદૃઢ બનાવવા જિલ્લા પોલીસ વડા યુવરાજસિંહ જાડેજા દ્વારા મોટો આંતરિક ફેરફાર કરવામાં આવ્યો છે. જિલ્લાના વિવિધ પોલીસ મથકો ખાતે ફરજ બજાવતા 12 બિનહથિયારી પોલીસ સબ-ઇન્સ્પેક્ટર (PSI)ની આંતરિક બદલીના હુકમ કરવામાં આવ્યા છે. બદલી પામેલા તમામ અધિકારીઓને નવી જગ્યાએ તાત્કાલિક હાજર થવા સૂચના આપવામાં આવી છે.પોલીસ અધિક્ષકની કચેરી દ્વારા બહાર પાડવામાં આવેલા આદેશ મુજબ, અલગ-અલગ પોલીસ મથકોમાં ફરજ બજાવતા PSIને નવી જવાબદારી સોંપવામાં આવી છે. બદલી પામેલા અધિકારીઓએ આદેશ મળતાની સાથે જ નવી જગ્યાએ હાજર થઈ ફરજ સંભાળવાની રહેશે તેમજ હાજરી અંગે જિલ્લા પોલીસ કચેરીને જાણ કરવાની રહેશે.
કયા PSIની ક્યાં બદલી?
- એસ.કે. વસાવા – ઉમરગામથી સરીગામ
- એસ.જે. પરમાર – ડુંગરાથી વાપી ઉદ્યોગનગર
- ડી.એલ. વસાવા – પારડીથી ધરમપુર
- વી.એ. વસાવા – ધરમપુરથી કપરાડા
- એલ.એસ. પટેલ – કપરાડાથી પારડી
- એ.ડી. કોડિયા – વાપી ટાઉનથી ભીલાડ
- જે.એસ. રવારી – ભીલાડથી ઉમરગામ
- એ.બી. ગોહીલ – વલસાડ સિટીથી વલસાડ રૂરલ
- પી.બી. ચૌધરી – વાપી ઉદ્યોગનગરથી વલસાડ સિટી
- આર.પી. કોડિયા – વલસાડ રૂરલથી ડુંગરા
- એસ.કે. રાઠોડ – વલસાડ સિટીથી વાપી ટાઉન
- આર.કે. પ્રજાપતિ – ડુંગરાથી ઉમરગામ
આંતરિક બદલીઓમાં વલસાડ શહેર ઉપરાંત વાપી, ઉમરગામ, સરીગામ, ડુંગરા, પારડી, ધરમપુર, કપરાડા અને ભીલાડ જેવા મહત્વના પોલીસ મથકોનો સમાવેશ થયો છે. ખાસ કરીને સરહદી વિસ્તાર તેમજ ઔદ્યોગિક વિસ્તારોમાં પોલીસ કામગીરીને ધ્યાનમાં રાખીને થયેલી આ બદલી મહત્વપૂર્ણ માનવામાં આવી રહી છે.વલસાડ જિલ્લામાં ઔદ્યોગિક વિસ્તારો, શહેરો અને ગ્રામ્ય વિસ્તારોની કાયદો-વ્યવસ્થાની જરૂરિયાત અલગ-અલગ હોય છે. વાપી-સરીગામ જેવા ઔદ્યોગિક વિસ્તારોમાં ગુનાખોરી ઉપરાંત ટ્રાફિક અને અન્ય કાયદો-વ્યવસ્થાના પ્રશ્નો મહત્વના છે, જ્યારે કપરાડા, ધરમપુર અને ઉમરગામ જેવા વિસ્તારોમાં ગ્રામ્ય અને અંતરિયાળ વિસ્તારોને કારણે પોલીસ માટે અલગ પ્રકારના પડકારો રહે છે.
કાયદો-વ્યવસ્થા વધુ અસરકારક બનાવવાનો પ્રયાસ
એકસાથે 12 PSIની આંતરિક બદલીઓ બાદ વલસાડ જિલ્લા પોલીસ તંત્રમાં નવી ગોઠવણ જોવા મળશે. નવી જગ્યાએ ફરજ સંભાળ્યા બાદ અધિકારીઓ સ્થાનિક પરિસ્થિતિનો અભ્યાસ કરી કાયદો-વ્યવસ્થા જાળવવા, ગુનાખોરી પર નિયંત્રણ મેળવવા અને પોલીસ કામગીરીને વધુ અસરકારક બનાવવા માટે કામગીરી કરશે.આંતરિક બદલીને કારણે પોલીસ મથકોમાં અધિકારીઓની નવી જવાબદારી નક્કી થતાં પોલીસ તંત્રમાં કામકાજને નવી દિશા મળવાની શક્યતા છે. હવે આગામી દિવસોમાં નવી જગ્યાએ ફરજ સંભાળનારા PSIની કામગીરી પર સ્થાનિક લોકોની પણ નજર રહેશે. ખાસ કરીને ગુનાખોરી, ટ્રાફિક વ્યવસ્થા અને જાહેર સુરક્ષાના મુદ્દે નવી ગોઠવણ કેટલી અસરકારક સાબિત થાય છે તે જોવું મહત્વપૂર્ણ રહેશે.
