જિલ્લા કલેક્ટર મનીષ ગુરવાનીએ વાંસદા તાલુકાના ઉનાઈ અને નવતાડ ગામની મુલાકાત લઈને આરોગ્ય, શિક્ષણ, બાળપોષણ અને પાયાની સુવિધાઓની સમીક્ષા કરી હતી. મુલાકાત દરમિયાન તેમણે ગ્રામ પંચાયત, આંગણવાડી, આરોગ્ય કેન્દ્ર અને મહાત્મા ગાંધી પુસ્તકાલયની મુલાકાત લઈ સંબંધિત અધિકારીઓ પાસેથી માહિતી મેળવી હતી. સાથે જ સ્થાનિક સમસ્યાઓના નિરાકરણ માટે જરૂરી સૂચનાઓ આપી હતી.
ઉનાઈમાં પાણી, જર્જરિત શાળા અને દીપડાના આંટાફેરા અંગે માહિતી મેળવી
કલેક્ટરે ઉનાઈ ગ્રામ પંચાયતની મુલાકાત દરમિયાન ગામની વસ્તી, આંગણવાડીઓ, જર્જરિત શાળાઓ, પીવાના પાણીની સમસ્યા અને વિસ્તારમાં દીપડાના આંટાફેરા અંગે વિગતો મેળવી હતી. ગામમાં પાયાની સુવિધાઓની સ્થિતિની સમીક્ષા કરી સ્થાનિક પ્રશ્નો અંગે સંબંધિત અધિકારીઓ સાથે ચર્ચા કરી હતી.
આંગણવાડીમાં કુપોષિત બાળકોની સ્થિતિ જાણી
ઉનાઈની આંગણવાડીની મુલાકાત દરમિયાન બાળકોને આપવામાં આવતા પોષણક્ષમ આહાર, કુપોષિત બાળકોની સ્થિતિ, પોષણ કિટના વિતરણ અને વાલીઓના કાઉન્સેલિંગ અંગે માહિતી મેળવી હતી. બાળકોને યોગ્ય પોષણ મળે અને તેમની આરોગ્યલક્ષી જરૂરિયાતોનું ધ્યાન રાખવામાં આવે તે માટે કરવામાં આવતી કામગીરીની સમીક્ષા કરી હતી.
આરોગ્ય કેન્દ્રમાં હાઈ-રિસ્ક ગર્ભાવસ્થાના કેસોની સમીક્ષા
કલેક્ટરે ઉનાઈ આરોગ્ય કેન્દ્રની મુલાકાત દરમિયાન દર્દીઓની સંખ્યા, હાઈ-રિસ્ક સગર્ભાવસ્થાના કેસો, સગર્ભા મહિલાઓને આપવામાં આવતું માર્ગદર્શન, લેબોરેટરીનાં સાધનો અને ઇન-પેશન્ટ વિભાગ (IPD)ની સુવિધાઓ અંગે માહિતી મેળવી હતી. આરોગ્ય સેવાઓ વધુ સુદૃઢ બનાવવા અને આરોગ્ય કેન્દ્રમાં માહિતી દર્શાવતાં બોર્ડ નિયમિતપણે અદ્યતન રાખવા સૂચના આપી હતી.
પુસ્તકાલયમાં વધારાનો હૉલ અને સોલાર પેનલને મંજૂરી
ઉનાઈના મહાત્મા ગાંધી પુસ્તકાલયની મુલાકાત દરમિયાન કલેક્ટરે અભ્યાસ કરતા બાળકો અને સ્પર્ધાત્મક પરીક્ષાઓની તૈયારી કરતા યુવાનો સાથે સંવાદ કર્યો હતો. વિદ્યાર્થીઓની અભ્યાસલક્ષી જરૂરિયાતો અને પુસ્તકાલયમાં ઉપલબ્ધ સુવિધાઓ અંગે ચર્ચા કરી હતી.
વિદ્યાર્થીઓને અભ્યાસ માટે વધુ સારી સુવિધા મળી રહે તે હેતુથી પુસ્તકાલયમાં વધારાનો હૉલ બનાવવા અને સોલાર પેનલ સ્થાપવાની દરખાસ્ત રજૂ કરવામાં આવી હતી. કલેક્ટરે આ દરખાસ્તને મંજૂરી આપી હતી. આ સુવિધાઓથી વિદ્યાર્થીઓને વધુ સારી અભ્યાસ વ્યવસ્થા ઉપલબ્ધ થવાની આશા છે.
ઉનાઈ માતાજીના મંદિરે પ્રવાસીઓની સુવિધા અંગે જાણકારી મેળવી
કલેક્ટરે ઉનાઈ માતાજીના મંદિરની મુલાકાત લઈને શ્રદ્ધાળુઓ અને પ્રવાસીઓ માટે ઉપલબ્ધ સુવિધાઓ તથા રોકાણ માટેના હૉલની વ્યવસ્થા અંગે માહિતી મેળવી હતી.
નવતાડમાં રસ્તા, આરોગ્ય અને સંરક્ષણ દીવાલની સમીક્ષા
નવતાડ ગ્રામ પંચાયતની મુલાકાત દરમિયાન કલેક્ટરે ગામની વસ્તી, આંગણવાડીઓ, જર્જરિત શાળાઓ અને પાયાની સુવિધાઓ અંગે માહિતી મેળવી હતી. આ ઉપરાંત આરોગ્ય કેન્દ્રને લગતા પ્રશ્નો, સંરક્ષણ દીવાલની જરૂરિયાત અને રસ્તાઓની સ્થિતિની સમીક્ષા કરી હતી.
કલેક્ટરની આ મુલાકાત દરમિયાન બંને ગામોમાં સ્થાનિક પ્રશ્નો અને વિકાસલક્ષી કામગીરી અંગે વિગતો મેળવવામાં આવી હતી. આરોગ્ય, શિક્ષણ, બાળપોષણ અને પાયાની સુવિધાઓને વધુ મજબૂત બનાવવા સંબંધિત અધિકારીઓને જરૂરી માર્ગદર્શન આપવામાં આવ્યું હતું.