વાપી: ચોમાસાની ઋતુમાં વરસાદથી બચવા માટે જરૂરિયાતમંદ લોકોને સહાયરૂપ બનવાના હેતુથી વાપીમાં હરિશ આર્ટ અને સેવા ભાવિ સહયોગી મિત્રો દ્વારા માનવતાવાદી સેવા કાર્ય હાથ ધરવામાં આવ્યું હતું. વાપી શહેર તથા આસપાસના વિસ્તારમાં આર્થિક રીતે નબળા અને જરૂરિયાતમંદ દરિદ્રનારાયણ વ્યક્તિઓને છત્રીઓનું વિતરણ કરવામાં આવ્યું હતું.
હરિશ આર્ટ દ્વારા છેલ્લા ઘણા વર્ષોથી સેવાકીય પ્રવૃત્તિઓ કરવામાં આવી રહી છે. ખાસ કરીને અંતરિયાળ આદિવાસી વિસ્તારોમાં જરૂરિયાતમંદ પરિવારો સુધી જીવનજરૂરિયાતની સામગ્રી પહોંચાડવા માટે સંસ્થા અને તેના સહયોગીઓ સતત પ્રયાસ કરી રહ્યા છે. વરસાદી મોસમમાં છત્રી જેવી સામાન્ય લાગતી પરંતુ રોજિંદા જીવનમાં અત્યંત ઉપયોગી વસ્તુ જરૂરિયાતમંદ વ્યક્તિઓને મળી રહે તે હેતુથી આ સેવા કાર્યક્રમનું આયોજન કરવામાં આવ્યું હતું.
છત્રી વિતરણ દરમિયાન જરૂરિયાતમંદ લોકોના ચહેરા પર ખુશી જોવા મળી હતી. વરસાદ દરમિયાન રોજગારી, મજૂરી અને અન્ય કામકાજ માટે બહાર નીકળતા ગરીબ પરિવારો માટે છત્રી ખૂબ જ ઉપયોગી સાબિત થશે. સેવા કાર્ય સાથે જોડાયેલા સહયોગીઓએ જણાવ્યું હતું કે સમાજના જરૂરિયાતમંદ લોકોની મુશ્કેલીને સમજીને શક્ય તેટલી મદદ કરવી એ સૌની સામાજિક જવાબદારી છે.
આ સેવા કાર્ય સાથે રાજ રેસીડેન્સી-2ના રહીશો દ્વારા કરવામાં આવેલી રાહત સેવાની પણ નોંધપાત્ર કામગીરી રહી છે. તાજેતરમાં વલસાડ જિલ્લામાં પડેલા ભારે વરસાદ અને વિનાશક પૂરના કારણે અનેક ગામોમાં ભારે તારાજી સર્જાઈ હતી. ખાસ કરીને ઝૂંપડાંમાં રહેતા ગરીબ અને આદિવાસી પરિવારોને મોટું નુકસાન થયું હતું. અનેક ઘરોમાં પાણી ઘૂસી જતાં અનાજ, કપડાં, ઘરવખરી અને દૈનિક ઉપયોગની ચીજવસ્તુઓ નષ્ટ થઈ હતી.
આ પરિસ્થિતિમાં રાજ રેસીડેન્સી-2ના પ્રેસિડેન્ટ મનીષભાઈ મેહતા અને સેક્રેટરી પ્રદીપભાઈ પંચાલના માર્ગદર્શન હેઠળ રાહત ટીમ બનાવી જરૂરિયાતમંદો સુધી સહાય પહોંચાડવામાં આવી હતી. દિવ્યકાંત (દીપક) દેસાઈ, રંજનબેન પંચાલ, પિન્કીબેન શર્મા સહિતની ટીમ તથા સોસાયટીના રહીશોના સહયોગથી અનાજની કિટ, સાદડી, કપડાં અને હાઈજિન કિટ તૈયાર કરવામાં આવી હતી.
હાઈજિન કિટમાં ટૂથપેસ્ટ, ટૂથબ્રશ, નાહવાનો સાબુ, કપડાં ધોવાનો સાબુ, કોપરેલ, શેમ્પૂ તેમજ મહિલાઓ માટે સેનેટરી પેડ જેવી આવશ્યક સામગ્રીનો સમાવેશ કરવામાં આવ્યો હતો. ટીમ વલસાડ જિલ્લાના અંતરિયાળ કાજણરણછોડ ગામે પહોંચી હતી અને પૂરના કારણે અસરગ્રસ્ત પરિવારોને રાહત સામગ્રીનું વિતરણ કર્યું હતું.
આ સેવાકીય પ્રવૃત્તિઓ સમાજમાં માનવતા અને પરસ્પર સહયોગનું ઉદાહરણ બની રહી છે. જરૂરિયાતમંદ વ્યક્તિ સુધી સમયસર મદદ પહોંચે ત્યારે સહાય માત્ર વસ્તુનું વિતરણ રહેતી નથી, પરંતુ મુશ્કેલીના સમયમાં કોઈ આપણી સાથે છે તેવો વિશ્વાસ પણ આપે છે. હરિશ આર્ટ, સેવા ભાવિ સહયોગી મિત્રો અને રાજ રેસીડેન્સી-2ના રહીશો દ્વારા કરવામાં આવી રહેલા સેવાકીય પ્રયાસોની સ્થાનિક સ્તરે પ્રશંસા થઈ રહી છે.
